Partiya Yekitiya Suryan: Hikumeta veguhêz berpirsê qetilkirina 2 ciwanan e

Partiya Yekitiya Suryan daxuyand ku hikumeta veguhêz a Sûriyeyê berpirsê qetilkirina 2 ciwanên li bajarokê Enazê yê Humsê ye.

3 cotmeh, 2025 12:49

NAVENDA NÛÇEYAN

1’ê Cotmehê li bajarokê Enazê yê herêma Wadî El Nesara yê rojavayê Humsê 2 ciwanên xiristiyan; Wîsam û Şefîq Mensûr ku birayên hev in, hatin qetilkirin. Partiya Yekitiya Suryan der barê qetilkirina her du ciwanan de daxuyaniyek da.

Partiya Yekitiya Suryan di daxuyaniyê de diyar kir ku qetilkirina her du ciwanan binpêkirina nirxên mirovî û welatparêziyê ye, di heman demê de wekî hedefgirtina hevgirtina pirrengiya civaka Sûriyeyê nirxand.

Partiyê daxuyand ku hikumeta veguhêz berpirsê vê sûcê ye û wiha domand: "Hikumeta veguhêz di aliyê parastina sivîlan de lawaz e û jî şêniyên wekî yên Wadî El Nesara bi xetereyan re tenê dihêle."

Partiyê bêdengiya li hemberî vî sûcî wek tevkariya rasterast bi qatilan bi nav kir. Her wiha bang li aliyên têkildar kir ku qatilên her du ciwanan aşkera bikin û tavilê hesab ji wan bipirsin. Her wiha banga parastina sivîlan û rêgirtina li ber binpêkirinan kir.

(bb)

ANHA