Li bajarê Hamburgê yê Almanyayê mitînga ‘statûya Rojava’

Meclîsa Gel a Kurd a Demokratîk a Hamburgê, bi armanca piştgirîdayîna berxwedana Rojava û ji bo daxwaza naskirina statûya siyasî ya Rojava, li bajarê Hamburgê yê Almanyayê mîtîngek lidar xist.

Mîtînga ku ji bo piştevaniya bi berxwedana li dijî komên hikumeta demkî û çeteyên bi piştgiriya Tirkiyê li Rojava tê meşandin hate organîzekirin, li ber navenda danûstendinê ya Mercado ya li taxa Altonayê pêk hat.

Mitînga ku bi pêşengiya Meclîsa Gel a Kurd a Demokratîk û Meclîsa Jinan a Rojbîn hate lidarxistin; TCŞ, Hamburg fur Kurdistan, Platforma Piştevaniya bi Rojava re, enternasyonalîstên Elman û rêxistinên jinan ên çep û sosyalîst beşdar bûn.

Di qada mîtîngê de pankarta bi nivîsa “Frieden für Rojava und Syrien – Nein zum Krieg” hate vekirin; her wiha alayên TEV-DEM û Kurdistanê û dowîzên ku balê dikşînin ser êrişên çeteyên HTŞ’ê hatin hildan. Çalakî bi rêzgirtina ji bo bîranîna şehîdên Kurdistan û şoreşê destpê kir.

Di mîtîngê de girseyê bêyî rawestiyan sloganên wekî “Bijî Serok Apo”, “Jin Jiyan Azadî”, “Terorîst Colanî, Terorîst Erdogan”, “Bijî Berxwedana Rojava”, “Alle zusammen gegen den Faschismus” û “Bijî Berxwedana YPG-YPJ” berz kirin û marşên berxwedanê hatin lêxistin.

Zelal Êzidî ya ku di mîtîngê de axivî, diyar kir ku nenasîna statûya Rojava ji bo nasnameya Kurd metirsiyeke mezin e û got: “Heke li Rojava statû neyê naskirin, wê nasnameya Kurd li seranserê Kurdistanê bikeve xetereyê. Ji ber vê yekê, heta ku statû bê naskirin divê em berxwedana bênavber bidomînin.”

Di daxuyaniya ku li ser navê ciwanên Rojhilatî hate dayîn de jî hate destnîşankirin ku hişmendiya ku lîderê HTŞ’ê Colanî temsîl dike tenê bi Rojava ve sînordar nîne. Di daxuyaniyê de bang hate kirin û hat gotin: “Heke pêşiya terorîst Colanî li Rojava neyê girtin, heman hişmendî dê li Rojhilat jî derkeve pêşiya me. Ji ber vê yekê, em berxwedana Rojhilat û Rojava bi hemû cîhanê bidin bihîstin.”

Mîtîng bi dirûşm û marşan bi dawî bû.