Koçberên Serêkaniyê li benda vegerê ne

Li Kampa Waşûkanî ya li Hesekê ya koçberên Serêkaniyê rewşa mirovî zehmet e û alîkarî kêm in. Koçberan xwest bi awayekî ewle vegerin warê xwe.

Koçbera bi navê Horiya Deham Silêman ji gundê Leylanê yê gundewarên Serêkaniyê ye, got: “Dema hin kes bi awayekî ferdî vedigeriyan gund û malên xwe ez jî vegeriyam. Tu nîşaneyên jiyanê li gund nin in. Mal wêrankirî ne û hîna gund tijî mayîn in.”

Horiyayê destnîşan kir ku xwesteka wan ew e ku bi ewle vegerin gundê xwe û wiha domand: “Ev çend sal e em rewşeke zehmet di kampê de dikişînin. Rêxistinan jî alîkarî li ser me qut kirine. Em dixwazin bi rengekî ewle vegerin malên xwe û ji bo jinûve avakirina destek were pêşkêşkirin.”

Feysel Tirkî ê ji gundê Tewîla, da zanîn ku alîkariyên mirovî li ser koçberan hatine qutkirin û roj bi roj zehmetiyên koçberan zêde dibin.

Feysel Tirkî diyar kir ku jiyan li gundên wan nabe û şênî naxwazin li kampê bimînin, dixwazin ewle vegerin gundê xwe û malên wan ji nû ve ava bikin.

Koçberê bi navê Ebûd El Lamî bi bîr xist ku koçberên kampê bi taybetî di zivistanî de û dema lehiyan de gelek zehmetiyan dikişînin û got çadir ne baş in û alîkarî qut bûne.

Ebûd El Lamî destnîşan kir ku daxwaza wan a yekane ew e ku komên çekdar ji Serêkaniyê derkevin û koçber vegerin gundên xwe. Her wiha got: "Em amade ne di vê kêliyê de vegerin û ji vê rewşa dijwar xilas bibin."

Casim Hemed ê ji gundê Ehrasê jî anî ziman ku piştî alîkarî li ser wan hatine qutkirin, konên wan xirab bûne û got: “Gundê me jî bi temamî wêran bûye. Şênî dixwazin bi awayekî birûmet û ewle vegerin.”

(bb)

ANHA