Koçberên Serêkaniyê bi vegerê kêfxweş in

Karwanê duyemîn ê koçberên Serêkaniyê îro vegeriya Serêkaniyê. Hejmara wan nêzî 7 hezar kesî (700 malbat) ye. 

Berî ku vegerin, koçber ji ANHA`yê re axivîn û diyar kir ku kêfxweş bûn ku piştî 7 salan vedigerin warê xwe û ew dixwazin bi ewle bijîn.

Ehmed Mihemed got: "Ez ji gundê El Menacîr im, gelekî kêfxweşim ku vedigerin, ez hêvî dikim ku hemû koçberên Sûriyeyê vegerin warê xwe. Mala min wêran bûye ez ê lê bikim û tê de bijîn."

Yasîn Îdan jî got: "Ez ji gundê El Menacîr im, ez kêfxweşim ku vedigerim, her kesê ku li kampan bi me re bûn alîkar em wan spas dikin û bi hêvî ne ku berî zivistanê hemû koçber vegerin."

Şemsa Hisên Ehmed got ew 7 salan li kampan bûn û wiha lê zêde kir: "Me li koçberiyê zor û zehmetî dît, malbatên ku vedigerin pêdiviya wan bi alîkariyê heye hayanî ku malên xwe lê bikin û pêdiviyên xwe yên sereke pêk bînin."

Fatma Ebdulrehman diyar kir ku malbatên dûrî xaka xwe bûn êş kişandin û got ew kêfxweşe ku vedigere mal û warê xwe.

Fatmayê anî ziman ku mala wê wêran bûye û ew ê di bin konan de bimînin heyanî ku mala xwe lê bikin. Di dawiyê de hêvî kir ku hemû koçber berî zivistanê vegerin Serêkaniyê.

(np)

ANHA