Koçberên ji Efrîn-Şehbayê xwe di nava komîn û saziyan de bi rêxistin dikin

2ˈyê Kanûna 2024ˈan nêzî 120 hezar şêniyên ji kantona Efrîn-Şehbayê ji ber êrişên çeteyên dewleta Tirk a dagirker koçberî kantona Tebqayê bûn. Hin koçber piştî çend rojan li kantonên Cizîrê û Reqayê hatin bicihkirin. Li gorî daneyan niha 2 hezar û 150 malbat li Tebqayê dimînin. 

Rêveberê Meclisa Koçberên Efrîn û Şehbayê li kantona Tebqayê Mistefa Reşîd ji ajansa me re ragihand ku piştî hatin û bicihbûna wan, rêveberên berê yên Rêveberiya Xweseriya Demokratîk a kantona Efrîn û Şehbayê ji bo avakirina meclisa koçberên Efrîn û Şehbayê li kantona Tebqayê kar kir.

Meclisa Koçberên Efrîn û Şehbayê ji 7 kesan pêk tê, 2 ji wan berdevkên meclisê ne, 5 kesên mayî jî bi kar û barên civakî, komîn û komîteyan re mijûl dibin.

Li Bajarê Werzîşê yê Tebqayê hezar û 50 malbat di 964 konan de dijîn, meclisê ji bo birêvebira kar û barên wan 8 komîn ava kirin.

Komîn di warê birêxistinkirina şêniyan, belavkirina nan û peydakirina pêdiviyan de bi rêya meclisê xebatên xwe bi rê ve dibin, di her komînê de 250-350 kes cihê xwe digirin.

Der barê komîteyên komînan de Reşîd got: "Komîteya tenduristiyê ji 15 kesan pêk tê, bi tenduristiya koçberan, paqijiyê û nexweşiyan re mijûl dibe. Komîteya şaredariyê ku ji 60 kesan pêk tê, bi çavdêriya paqijiya kampê û belavkirina avê re mijûl dibe.

Komîteya Malbatên Şehîdan ji 2 rêveberên berê yên Meclisa Malbatên Şehîdan a Kantona Şehbayê pêk tê û niha kar û barên malbatên şehîdan dike.

Komîteya parastinê ji 25 endamên berê yên Hêzên Parastina Civakî pêk tê, niha bi şev çavdêriya parastina hundirê kampê dike.

Her wiha komîteyeke parastina derve ya ku ji 25 endamên berê yên Hêzên Ewlekariya Hundirîn ên kantona Efrînê û Şehbayê pêk tê, niha jî ji bo parastina ketin û derketina kampê dixebitin.

Komîteya sotemeniyê ku ji 15 kesan pêk tê, çavdêriya belavkirina mazotê ji bo otombîlên şêniyan dike, her wiha ji bo şêiyên li hundir û derveyî Bajarê Werzîşê mazotê belav dike. "

Li gorî Reşîd li derveyî Bajarê Werzîşê nêzî hezar û 100 malbat hene, li dibistananan, avahiyên akademiyan û malan hatine bicihkirin. Ji bo wan jî komîn û komîte hatine avakirin.

Komîteyên ku hatine avakirin, giraniyê didin ser birêvebirina kar û barên kampan û peydakirina pêdiviyên koçberan, da ku koçber bi xwe kar û barên xwe bi rê ve bibin.

(k)

ANHA