Jinên li Siwêdayê rexneyên tund li ‘Danezana Destûrê’ kirin

Çalakvanên jin ên li Siwêdayê ji ajansa me re der barê Danezana Destûrê ya desthilata Şamê de axivîn û bandora wê ya neyînî yên li ser dadweriyê, mafên jinan û mafên civakên Sûriyeyê nirxandin.

Endezyara çandiniyê Dîna Derwîş dilgiraniya xwe têkildarî nebûna dîtineke zelal di destûra nû de anî ziman û tekez kir ku jin ne hewceyî mineta te kesî ne, ji ber ku jin beşa bingehîn a civakê ne û “civak nikare bi lingekî bi rê ve here”.

Dîna Derwîş bang kir ku rola jinan di destûrî de bi hêz bibe û di avakirina dewleteke dadmend û demokratîk de bi awayekî aktîf beşdar bibin.

Asala Aslan a rêvebira Kar û Barên Jinan a Siwêdayê diyar kir ku Danezana Destûrê ya desthilata Şamê, jinan ji sedî 80 paşguh dike û ev yek jî nîşana paşketine mezin a mafên jinan e.

Çalakvana bi navê Şirûq El Ebdela jî dilgiraniya xwe li hember Danezana Destûrî anî ziman û da zanîn ku dûrxistina jinan rê li ber pêkanîna armancên wan ên civakî digire û wan ji rola wan a girîng a di avakirina siberoja Sûriyeyê de bê par dihêle.

Her sê çalakvanan li ser girîngiya guhertina destûrê hemfikir in, da ku hemû netewe, ol û mezheban bihewîne û dadmendî û wekheviyê ji bo hemû sûriyeyiyan pêk bîne.

(k)

ANHA