Îlham Ehmed û Ebdulkerîm Omer tev li Konferansa Aştî û Entegrasyona Demokratîk bûn

Hevseroka Daîreya Têkiliyên Derve ya Rêveberiya Xweser Îlham Ehmed û berpirsê Meclisa Têkiliyan a Kurd- Sûriyeyê li Şamê Dr. Ebdulkerîm Omer bi rêya bernameya Zoomê beşdarî Konferansa Aştî û Entegrasyona Demokratîk bûn ku li Londonê tê lidarxistin.

 Di konferansê de rewşa siyasî ya Sûriyeyê, pêşketinên diyalog û entegrasyonê, rêbazên misogeriya mafên tevahî pêkhateyan di çarçoveya destûra demokratîk de hatin nîqaşkirin.

Di rûniştina têkildarî rewşa Rojavayê Kurdistanê û Sûriyeyê de Ebdulkerîm Omer û Îlham Ehmed rewşa siyasî ya Sûriyeyê piştî hilweşîna rejîma Baas’ê, astengiya di pêvajoya veguhêz de, asoyên avakirina pergala siyasî ya nû ku mafên tevahî pêkhateyên Sûriyeyê misoger bike şîrove kirin.

Di nirxandinan de behsa peymana 29’ê Çileyê, gavên di çarçoveya peymanê de hatine avêtin, astengiyên li hemberî bendên ku hîna nehatine bicihanîn, girîngiya çareserkirina pirsgirêkan bi rêya diyalogan bi taybetî pirsgirêkên girêdayî mafên çandî û zimanî hat kirin.

Hate gotin ku mafê perwerdehiya bi zimanê Kurdî heye, divê nasname û mafên çandî yên Kurd werin parastinê, xebat bi tevahî hêzên neteweyî û demokratîk ên li Sûriyeyê re were dewamkirin ku bigihînin çareseriya siyasî ne.

Di wan axaftinan de girîngiya nivîsandina destûreke demokratîk a li ser bingeha lihevkirinê hate vegotin. Hate diyarkirin ku divê destûrek were nivîsandin ku mafên pêkhateyên neteweyî, olî û çandî misoger bike û beşdariya siyasî û azadiyên giştî pêş bixe. Her wiha girîngiya avakirina sîstemeke rêveberiyê ya nenavendî ku rê bide herêman karûbarên xwe di çarçoveya Sûriyeyeke yekbûyî de bi rê ve bibin destnîşan kirin.

Konferansa Aştî û Entegrasyona Demokratîk (Peace and Democratic Integration Conference) ku ji aliyê Navenda Lêkolînên Kurd (Centre for Kurdish Affairs) ve tê lidarxistin duh li paytexta Îngilistan Londonê dest pê kir. Konferans bi beşdariya siyasetmedar, kesayetên sivîl, akademisyen, lêkolîner û pisporên dozên aştî, diyalog û entegrasyona demokratîk du rojan didome.

(f)