Hevdîtina Rêveberiya Xweser û Şamê û plana Xezayê rojevên rojnameyên erebî ne

Rojnameyên erebî di hejmarên xwe yên vê sibehê de civîna di navbera şandeya Rêveberiya Xweser û hikumeta veguhêz de û dan û standinên di navbera şandeyên Îsraîl û Hemasê de nirxandin.

’CIVÎNA LI ŞAMÊ YA DI NAVBERA EL ŞERI Û EBDÎ DE BI ATMOSFEREK ERÊNÎ BI DAWÎ BÛ’

Rojnameya El Şerq El Ewsat hevdîtina li Şamê ya di navbera şandeya Rêveberiya Xweser û hikumeta veguhêz de wekî "atmosferek erênî" nirxand. Rojnameyê ku xwe spartiye daxuyaniya serokatiya hikumeta veguhêz diyar kir ku di civînê de mekanîzmayên pêkanîna bendên Peymana 10`ê Adarê ya di navbera Fermandariya Hêzên Sûriyeya Demokratîk û hikumeta veguhêz de hatiye îmzekirin, her wiha pevçûnên dawî yên li bajarê Helebê, hatin gotûbêjkirin.

Li gorî rojnameyê, hin çavkaniyên din ragihandin ku di hevdîtinan de mijarên "nenavendîbûnê" û "entegrasyona saziyan" jî hatin gotûbêjkirin.

Rojnameyê ku agahiyên xwe spartiye çavdêran diyar kir "civînên ku roja Sêşemê li Şamê hatin lidarxistin di aliyê beşdarbûn û nûnertiyê de yên herî mezin bûn û atmosfer erênî bû."

Rojnameya El Sûrî jî bal kişand ser rewşa taxên Şêxmeqsûd û Eşrefiyê. Hate gotin, li gorî çavdêran, armanca aloziyên li Şêxmeqsûd û Bakur û Rojhilatê Sûriyeyê ew e ku hikumet hin destkeftiyên siyasî yên demkî bi dest bixe û têkçûnên xwe ya aborî û xizmetguzariyê veşêre.

’DAN Û STANDINÊN LI ŞERM EL ŞÊX BI GEŞBÎNIYÊ TENÊ BI SER NAKEVIN’

Rojnameya Al Nahar behsa nakokiya di navbera helwestên Serokê Dewletên Yekbûyî yên Amerîkayê Donald Trump û Serokwezîrê Îsraîlê Benjamin Netanyahu de ya li ser plana Amerîkî ya ji bo Xezayê kir, bi taybetî piştî destpêkirina dan û standinên nerasterast di navbera Hemas û Îsraîlê de li Şarm El Şêx, bi navbeynkariya Misrê.

Rojnameyê destnîşan kir ku Trump geşbîn e ku dan û standin bi ser bikevin û dibêje Hemasê pir tişt qebûl kirine. Lê Netanyahu israr dike ku bingeha planê divê bêçekkirina Hemasê û bidawîanîna desthilatdariya wê li Xezayê be.

Li aliyekî din, rojnameya Haaretz a Îsraîlê jî li ser zimanê şîrovekaran diyar kir ku tevî pêşketinên ku hatine bidestxistin jî, dibe ku Netanyahu peymanê têk bibe, ev yek dibe bibe sedema ku ew û Trump rasterast werin hemberî hev.

(k)