Gelê Kobanê sersaxî da malbata şehîd Zîn Zagros

Gelê kantona Firatê, endamên sazî û dezgehên Rêveberiya Xweser berê xwe da gundê Yaremez ê Kobanê da ku sersaxiyê bidin malbata şehîd Zîn Zagros (Gulê Hiso) ku 1'ê Nîsanê li herêma Garê şehîd bûbû.

Endama Meclisa Malbatên Şehîdan navçeya Şêranê Bedîa Miho sersaxî ji malbata şehîd Zîn re xwest û got: “Şehîd Zîn ji bo ku bi fikir û felsefeya Rêber Abdullah Ocalan têkoşîna xwe berdewam bike, gihaşt asta şehadetê. Bi hezaran dê wekî şehîd Zîn hebin û têkoşîna wê bidomînin.”

Endamê Meclisa Giştî a Partiya Yekitiya Demokratîk (PYD) Salih Nûh jî sersaxî ji malbata şehîd re xwest û wiha got: “Heqîqeta me, ew rûmeta me ya ku em jiyan dikin, ew şehîdên me ne. Şehîd Zîn ew jî yek ji wan heqîqetan û rûmeta me ye. Şehîd Zîn ew zilm û zora dijmin tu carî qebûl nekir û têkoşîna xwe li hember dijmin ranewestand. Em wek gelê Kurd, em ê tola şehîdên xwe ji dijmin hilînin.”

Dayika şehîd Zîn Zagros Celîle Mihemed jî wiha axivî: “Şehîd Zîn Zagros bi îradeya xwe û hêza wê ya bilind tev li nava refên gerîla bû. Em silavê xwe ji bajarê Kobanê heta Îmraliyê ji Rêber Abdullah Ocalan re dişînim. Em xwîna Zînê li her çar parçeyên Kurdistanê pîroz dikim. Wê bi hezaran li şûna Zînê têkoşînê bilind bikin û wê xeta têkoşîna Zînê bişopînin.”

Piştre wesîqeya şehîd Zîn Zagros hate xwendin û radestî malbatê hat kirin û girseya gel derbasî bin konê sersaxiyê bû.

)sş(

ANHA