Di nava çalakiyên 8`ê Adarê de çandina daran û serdana saziyan

Li herêmên Bakur û Rojhilatê Sûriyeyê bi dirûşma "Bi vîna jina azad em siyasetên qirkirinê, dagirkerî û tecrîdê têk bibin" çalakiyên cihereng li dar ketin.

ÇILAXA

Jinan li kantona Cizîrê çalakiyên cihereng li dar xistin. Li Çilaxayê endamên Kongra Star û saziyan serdana bendên kontrolê yên Hêzên Ewlekariya Hundirîn kir û gul dan wan.  Jinan bi cil û bergên xwe yên herêmî tev li van çalakiyan bûn.

Dûre endamên Hêzên Ewlekariya Hundirîn tevî şandeya jinan li bendê darên merx, sewlî û gul çandin.

Piştî wê şande serdana Mala Gaziyan kir û gul dan endaman. Der barê serdanê de endama Kongra Star Nizhe Seyf El Dîn got: "Bi saya fikr û felsefeya Rêber Abdullah Ocalan û fedakariyên şehîdan û gaziyan em gihaştine vê rojê û jin ewqas destkeftî bi dest xistin."

Nizhe wiha domand: "Bi saya şehîdan û fedakariyên birîndaran, em vê rojê di nava ewlehiyê de pîroz dikin."

Piştî serdanê broşûr li jinan hate belavkirin û bi dehan jin xelekên govendê li ber stranan li pêşiya navenda Kongra Star a li Çilaxayê gerandin.

Girêdayî heman mijarê, bi dehan jin tev li vekirina projeya Nivîsgeha Jinan a Şaredariya Gel bûn. Nivîsgehê dikana "Narîn" a madeyên xwarinê li naverasta navçeyê vekir.

Hevseroka Şaredariya Gel Firyal El Qesûm bi xêrhatina beşdaran kir û 8`ê Adarê li jinan pîroz kir û diyar kir ku wan ev proje li dar xistiye ji bo ku piştgiriya projeya jinan bê kirin û jin bikarin xwe bispêrin xwe.

Dikan ji aliyê dayîkên şehîdan ve hate vekirin.

TIRBESPIYÊ

Li navçeya Tirbespiyê endamên Kongra Star, Meclisa Malbatên Şehîdan, bi dehan jin serdana bendên kontrolê yên Hêzên Ewlekariya Hundirîn ên li têketin û derketina navçeyê kir û ev roj li wan pîroz kir.

Dûre jinan dar çandin.

DÊRAZOR

Bi dehan jin li kantona Dêrazorê, serdana saziyên sivîl û leşkerî yên kantonê kir û gul û diyarî li wan belav kir.

Şandeya jinan, 8`ê Adarê li karmendan pîroz kir. Her wiha diyarî li karkerên paqijiyê jî belavkirin.

TEBQA

Cîgira Meclisa Partiya Sûriya Pêşerojê ya kantona Tebqayê Barîn Mamo daxuyaniyek xwend.

Di daxuyaniyê de hate destnîşankirin ku jinan li hember zulmê û çewisandinê lehengiyeke bêhempa nîşandaye, bendên tirsê şikandiye, daketiye qadan û banga wekheviyê, edaletê û azadiyê kiriye û hewl daye wan nirxan bixe piratîkê.

MINBIC

Meclisa Kombûna Jinan a Zenûbya bi koordîneya Desteya Şaredariyan a kantona Minbicê û bi tevlêbûna bi dehan jinan, li parka El Beyram a li bajêr dar çandin.

Endama Desteya Şaredariyan Riwede Osman got: "8`ê Adarê hebûna me ye û delîla berdewamkirina şoreşê û rola girîng a jinan di pêşxstina civakê de ye. Em bê deng namînin û ji bo ku mafên xwe bi det bixin, dê têkoşînê berdewam bikin."

Endama Nivîsgeha Jinan a Xeta Xerbî Îlham Serdar jî got: "Bi vê boneyê re, me gelek çalakî li dar xistin ji bo ku girîngiya vê rojê di dîroka jinan de şîrove bikin. Di vê rojê de em dar di parkan de diçînin ji bo ku bajarê xwe bedew bikin."

KOBANÊ

Li Kobanê jî komxebatek li ser siyasetên qirkirin û înkarê yên li hemberî jinan û têkoşîna jinan hat lidarxistin.

Komxebat ji aliyê Meclisa Jinan a PYD`ê ya kantona Firatê ve bi dirûşma "Em ê bi hev re roja 8’ê Adarê bikin roja bilindkirina têkoşîn û berxwedanê" hat lidarxistin. Di komxebata li Hola Newroz a li Kobanê de, endamên PYD’ê, nûnerên Partiya Sûriya Pêşerojê, Kongreya Star, dezgehên Rêveberiya Xweser, saziyên civaka sivîl, Hêzên Ewlekariya Hundirîn û TEV-DEM’ê amade bûn.

Komxebat li ser 2 beşan bi rê ve çû. Beşa yekemîn ku li ser dîroka 8’ê Adarê û wateya wê ji bo jinên Kurd bû, ji aliyê berdevka Desteya Perwerde û Fêrkirinê ya Kantona Firatê Sozdar Mehmûd ve hat xwendin. Beşa duyemîn ku li ser têkoşîna jinên Kurd, şoreş û pêşengiya wan ji bo cîhanê ji aliyê endama Meclisa Giştî ya PYD’ê Sara Qewas ve hat pêşkêşkirin.

Sozdar dîroka ragihandina 8’ê Adarê vegot û got: "Sala 1857’an li New Yorkê di hundir fabrîqeya cilan de ji aliyê hêzên dewletê ve 129 jin hatin şewitandin. Wan jinan dixwest maf û keda xebatên xwe bigirin. Ji bo vê her tim jin di nava têkoşênê de bûn."

Endama Meclisa Giştî ya PYD’ê ya Kantona Firatê Sara Qewas jî got: “Di dîrokê de  rewşa jin û koletiya ku li ser hatiye pejrandin, her wiha ew fikrê mêrdewlet a ku her jin weke koleyekê û amûrekê tê bikar anîn. Di dîrokê de ew zihniyeta baviksalarî her tim dixwestin mafê jinê tune kirin. Lê her tim jinê bi hêza xwe têkoşîn dikir û heta roja me ya îro jin têkoşînê dike."

Beşdaran li ser mijarên komxebatê nêrînên xwe anîn ziman. Têkoşîna jinan û nirxandinên Rêber Abdullah Ocalan ên der barê rola jinan de hatin destnîşankirin.

ANHA