Di êrişa DAIŞ’ê li Dêrazorê de endamekî Ewlekariya Hundirîn birîndar bû

Di êrişa şaneya çeteyên DAIŞ'ê ya li rojhilatê Dêrazorê de, endamekî Hêzên Ewlekariya Hundirîn birîndar bû.

2 tîrmeh, 2025 23:12

NAVENDA NÛÇEYAN

Fermandariya Giştî ya Hêzên Ewlekariya Hundirîn ên Herêma Bakur û Rojhilatê Sûriyeyê ragihand ku şaneyeke çeteyên DAIŞ'ê li gundewarê rojhilat ê Dêrazorê êrişek pêk anî, di encamê de endamekî hêzan birîndar bû.

Fermandariyê di daxuyaniyê de diyar kir ku êriş saet di 12'ê nîvro de ji aliyê 2 çeteyan ve li ser motorsiklêtê bûn pêk hat. Çeteyan, dema ku endamê hêzan li ser erka xwe ya li navendekî ewlehiyê bû, gule yekser avêtin wî, û di dest û sîngê xwe de birîndar bû.

Di daxuyaniyê de hat diyarkirin ku şêniyan endamê hêzan rakirin nexweşxaneya herî nêzik û piştre ber bi nexweşxaneyên Cizîrê ve hat rêkirin.

Fermandariyê destnîşan kir ku şaneyên çeteyên DAIŞ'ê hewl didin bi van êrişan aramî û ewlehiya herêmê têk bibin. Her wiha fermandariyê got ew ê bi ser şaneyên terorîst de bigirin û bi hevkariya hêzên hevbeş û xelkê herêmê wan tune bikin.

(mh/fr)

ANHA