Di bîranîna şehîd Bêrîtan de soza mezinkirina tekoşîna li dijî xayînan

Kongra Star li bajar û navçeyên kantona Qamişloyê (Qamişlo,Amûdê, Dêrik, Tirbespiyê, Girkê Legê, Çilaxa, Til Koçer, Til Hemîs) ji bo bîranîna fermandar Bêrîtan (Gulnaz Karataş) di salvegera 31`emîn a şehadeta wê de meş li dar xistin. 

Fermandar Bêrîtan sala 1992`yan li herêma Xakurkê dema çekdarên Partiya Demokrat a Kurdistanê (PDK) hewl da wê dîl bigirin bi çalakiya fedaî xwe ji kendêl avêt û şehîd bû.

Li bajarê Qamişlo bi dehan jin tevlî meşê bûn. Jinan wêneyên şehîd Bêrîtan ên bi nivîsên “Bijî Berxwedan Bimire Xiyanetê”, wêneyên Rêber Abdullah Ocalan û alên Kongra Star rakirin.

Çalakvanên ku 1500 metre (ji çarxerêya Sonî heta çarxerêya Şehîd Rûbar Qamişlo) meşiyan, bi dirûşmeyan xeta fedaîtiyê ya şehîd Bêrîtan silav kir û xiyaneta PDK`ê şermezar kir.

Meş li çarxerêya Şehîd Rûbar Qamişlo veguherî mitîngê. Li wir endama Koordînasyona Kongra Star Şîraz Hemo axivî. Şêrazê hemû tekoşerên li dijî dagirkeran û hevakarên wan şer kirin û gihîştin şehadetê, bi bîr anîn.

Şîraz bal kişand ser berdewamkirina xeta îxanetê ya PDK`ê û got: “Hê jî PDK xeta îxanetê didomîne, bi dewleta Tirk a dagirker re hevkariyê dike, êrişî gerîlayan dike û kesayetên welatparêz binçav dike.”

Şîraz îşaret bi êrişên dewleta Tirk a dagirker û hedefgirtina pêşengên Şoreşa Bakur û Rojhilatê Sûriyeyê jî kir û got: “Têkoşîna jinan li herêmê ya li ser xeta şehîd Bêrîtan xurttir dibe, dê ev têkoşîn li gorî felsefeya Jin, Jiyan, Azadî ya Rêber Abdullah Ocalan bidome.”

AMÛDÊ

Şêniyên navçeyê ji pêşiya çarxerêya Jinan dest bi meşê kir. Di meşê de wêneyên Rêber Abdullah Ocalan, alên Kongra Star û pankertên bi nivîsên “Bijî Berxwedan Bimire Xiyanet”, wêneyên şehîd Bêrîtan û şehîdên tevgera azadiyê ya jin hildan. Her wiha dirûşmeyên silavkirina xeta şehîd Bêrîtan û dirûşemyên “Jin, Jiyan, Azadî” û “Bimire îxanet” berz kirin.

Meşvan di kolanên sereke yên navçeyê re geriyan û li pêşiya Şaredariya Gel a navçeyê rawestiyan. Li wir piştî rêzgirtinê axaftin hatin kirin. Endama rêveberiya Kongra Star Nûra Hisên axaftinek kir û bi van gotinan bal kişand ser taybetiyên şehîd Bêrîtan: “Şehîd Bêrîtan dema xwendekar bû bi zîrekî, çalakî û ruhê xwe yê şoreşgerî hat nasîn. Piştî tevlêbûna nava refên tevgera azadiyê jinê jî li dijî xiyanet û koletiyê têkoşiya.”

Nûra behsa helwesta dîrokî ya şehîd Bêrîtan li hember PDK`ê kir û got: “Di pêvajoyekê de ku hemû pergal û di nav de PDK dijberî tevgera azadiyê ya Kurdistanê derketin, şehîd Bêrîtan ku teslîmiyet qebûl nekir helwesteke dîrokî nîşan da. Bi çalakiya xwe ne tenê peyamek da xayînan, lê belê peyamek da hemû jinên cîhanê. Îro tevahî jinên cîhanê şehîd Bêrîtan ji xwe re pêşeng dibînin.”

Nûra bi bîr xist ku şehîd Bêrîtan bi çalakiya xwe xeta “Na ji xiyanetê re, Na ji teslîmiyetê re” da avakirin û bi şehadeta xwe jî pergala xweparastinê ya jinê xurt kir, ku piştre artêşa taybet a jinan hat avakirin.

TIRBSPIYÊ

Meşê ji pêşiya Meclisa Malbatên Şehîdan li rojavayê navçeyê dest pê kir. Dirûşmeyên ku berxwedana lehengane ya şehîd Bêrîtan silav dikin û xeta xiyanetê şermezar dikin, hatin berzkirin. Her wiha pankertên bi nivîsên “li ser xeta şehîd Bêrîtan em li dijî xeta xiyanetê ya PDK`ê têdikoşin” hatin rakirin.

Meş li pêşiya navenda Kongra Star a li rojhilatê navçeyê veguherî mitîngê. Li wir li ser navê Kongra Star Asya Cûma axivî. Asya got: “Xayînan her tim hewl daye îradeya gelê Kurd têk bibe, lê belê îradeya me ji siyasetên wan bi hêztire. Şehîd Bêrîtan ev rê nîşanî me da.”

Endama Kongra Star Necah Qeso jî diyar kir ku şehîd Bêrîtan sembola jina azad e ya ku zordestî qebûl nekiriye.

ÇILAXA

Bi sedan şêniyên navçeyê, nûnerên partiyên siyasî, saziyên Rêveberiya Xweser bi meşekê şehîd Bêrîtan bi bîr anî.

Girseyê ji pêşiya Meclisa Navçeya Çilaxa dest bi meşê kir. Wêneyên Rêber Abdullah Ocalan û şehîd Bêrîtan hatin rakirin.

Meşvan li qada Geracê rawestiyan. Piştî rêzgirtinê, endama Kongra Star a navçeyê Nezha Yûsif axivî û diyar kir ku destkeftiyên di şoreşa Bakur û Rojhilatê Sûriyeyê de hatine bidestxistin, encama fedakarî û lehengiya şehîda in. Nezha anî ziman ku rêwîtiya şehîd Bêrîtan rêwîtiya rûmet û berxwedana li dijî xayînan e û soza berdewamkirina têkoşîna şehîdan da.

GIRKÊ LEGÊ

Şêniyên navçeya Girkê Legê jî bi heman armancê meşek li dar xist, endamên saziyan, meclisên sivîl, tevger û rêxistinên jinan beşdarî meşê bûn.

Çalakvanên ku dirûşmeyên silavkirina berxwedana şehîd Bêrîtan berz kirin. ji Qada Şehîd Xebat dest bi meşê kir. Meû li sûka navendî veguherî mitîngê. Li wir ji rêveberiyên Kongra Star Xaliye Selmo axivî. Xaliye destnîşan kir ku têkoşîna gerîla û jinan siyasetên dijberî gelan vala derxistin û got: “Şehîd Bêrîtan sembola van fedkariyên di oxira jiyana bi rûmet de hatine nîşandan e.”

Xaliye anî ziman ku divê têkoşîna li dijî xeta xiyanetê mezin bibe.

Endama Kongra Star Seher Îsmaîl jî diyar kir ku ew ê têkoşîna li ser xeta şehîd Bêrîtan heta bidestxistina azadiyê bidomînin.

TIL KOÇER

Şêniyên navçeyê tevî endamên saziyan, Meclisa Malbatên Şehîdan, nûnerên eşîran û endamên Kongra Star ji çarxerêya El Delê dest bi meşê kir. Meşvanan bênavber dirûşmeyên “Bimire Îxanet” berz kirin û pankertên bi nivîsên “Bijî Berxwedan Bimire Îxanetê” bilind kirin.

Piştî ku di kolanên sereke re geriyan, meşvan li sûka navendî rawestiyan. Li wir, endama Kongra Star a navçeyê Fadiye Qedrî axivî. Fadiye bal kişand ser berxwedana lehengane ya şehîd Bêrîtan li hemberî dijmin û xayînan û got: “Şehîd Bêrîtan xeta jina azad afirand. Lehengî û çalakiya şehîd Bêrîtan ji bo tevahî jin û gelan peyamek wiha bû ku bi îradeyê dê serkeftin pêk were.”

Endama Komîteya Jinan a meclisa navçeyê Emel Cilûd jî li ser navê jinên Ereb axivî û got: “Wekî jinên Ereb di berxwedana li dijî zihniyeta baviksalar de em xet û têkoşîna şehîd Bêrîtan esas digirin.”

Emel doz da ku heta tevahî jinên cîhanê azadiya xwe bi dest dixin ew ê têkoşînê mezin bikin.

TIL HEMÎS

Şêniyên navçeya Til Hemîsê, nûnerên meclis, saziyên sivîl, Yekîtiya Jinên Ciwan, Tevgera Ciwanên Şoreşger ên Sûriyeyê ji pêşiya avahiya meclisa navçeyê dest bi meşê kir.

Meş li pêşiya navenda Desteya Çandiniyê ya li bakurê navçeyê veguherî mitîngê. Li wir piştî rêzgirtinê, endama rêveberiya Kongra Star Hele El Muxlif axivî û diyar kir ku şehîd Bêrîtan ku li hember îxanetê teslîm nebû ji bo tevahî jinan nimûne ye.

Endamê rêveberiya Partiya Yekîtiya Demokratîk (PYD) Heyal El Xiwêr jî soza şopandina rêya şehîdan da.

Hevseroka Şaredariya Gel a Til Hemîsê Firyal Mihemed jî anî ziman ku têkoşîna şehîd Bêrîtan ji bo tevahî jinan sembola bexwedana hemdem e.

DÊRIK

Li bajarê Dêrikê jî bi sedan jin û şêniyên bajêr beşdarî meşê bûn. Meşê ji Qada Azadî dest pê kir. Tê de alên Kongra Star, wêneyên Rêber Abdullah Ocalan, wêneyên şehîd Bêrîtan hatin bilindkirin û bênavber dirûşmeyên mîna “Bijî berxwedan” hatin berzkirin.

Meş li sûka navendî veguherî mitîngê. Dayika şehîd Hevrîn Xelef û endama Meclisa Malbatên Şehîdan a Dêrikê Sûad Mistefa axaftin kir. Sûad di şexsê şehîd Bêrîtan de hemû şehîdên azadiyê bi bîr anîn û got: “Bêrîtan li hember zilmê serî netewand, ew li hemberî zilmê sekinî û ji bo ku nekeve destê xayînan xwe ji serê çiyê avêt.”

Sûad soz da hemû şehîdan ku ew ê heta rizgarkirina tevahî xaka Kurdistanê û pêkanîna azadiya fîzîkî ya Rêber Abdullah Ocalan rêya wan bişopînin.

Endama rêveberiya Mala Jinê ya Dêrikê Xailye Remedan jî wiha axivî: “Şehîd Bêrîtan got na ji xiyanetê re. Îro jî em li dijî xiyanetê û komployên dijî me û projeya me têdikoşin.”

Xaliye diyar kir ku çalakiya şehîd Bêrîtan lehengiya jina azad îsbat kir û ji hemû jinan re tekez kir ku dê serkeftin her tim para vîna xurt be.

Hemû çalakî bi dirûşmeyên silavkirina berxwedanê û şermezarkirina îxanetê bi dawî bûn.

(c)

ANHA