DEM Partî derbarê şewatê de daxuyanî da

DEM Partiyê têkildarî şewata li navçeyan Şemrex Mêrdînê  û Çinarê ya Amed ên bakurê Kurdistanê daxuyaniyek da û got: "Vê karesatê careke din nîşan da ku desthilatdarî û dewlet di dema felaketê de ne bi gel re ye."

DEM Partî derbarê şewatê de daxuyanî da
21 hezîran 2024   13:21
 NAVENDA NÛÇEYAN

Partiya Demokrasî û Wekheviyê ya Gelan (DEM Partî) têkildarî şewata li navçeya Şemrexa Mêrdînê û navçeya Çinara Amedê li ser hesabên xwe yên medya dîjîtal daxuyaniyek weşand.

 Di daxuyaniyê de hate ragihandin ku ji ber şewata doh bi şev dest pê kir û li qadeke berfireh belav bû 7 kesan jiyana xwe ji dest dan, 44 kes birîndar bûn ku rewşa 10 ji wan giran e.

 Di daxuyaniyê de wiha hat gotin:

"Em birînên ji ber karesata şewatê bi gelê xwe re dipêçin. Êşa me giran e, serê gelê me sax be. Em ji birîndarên xwe re şîfayê dixwazin. Li hemberî şewatê ku desthilatdarî ji aliyê destwerdanê ve dereng ma, kêm ma, di serî de Amed, Mêrdîn û Wanê hemû şaredariyên me yên li herêmê ji bo vemirandina şewatê seferber bûn û alîkarî gihand gel.

 Hevşaredarên me, parlamenterên me, hevserokên DBP'ê Çîgdem Kiliçgun Ûçar û Keskîn Bayindir ku ji pêkhateyên partiya me ne, li gundên karesatê lê rû da, bi gel re hem êşên gel parve dikin hem û birînan dipêçin. Vê karesaetê careke din nîşan da ku di felaket û karesatan de dewlet û desthilatdarî ne bi gel re ye. Di dema erdhejê de nebûn, di şewatê de nînin, di lehiyê de nînin. Lê belê em xwedî wê hêzê ne ku tevî gelê xwe ji bin hemû felaketan rabin."