Çalakvanên greva birçîbûnê: Felsefeya Rêber Abdullah Ocalan hêvî ye

Îro çalakiya piştgiriya berxwedana li zindanên dewleta Tirk, li Qamişloyê bi dirûşma “Em ê berxwedana zindanan zindî bikin û bi rih û nirxên şehîdan Rêberê xwe azad bikin" di çarçoveya Însiyatîfa Gel a Kantona Cizîrê de dest pê kir.

Serê sibê li ber avahiya Komîseriya Bilind a Kar û Barên Penaberan a NY`yê ya li Qamişloyê konê greva birçîbûnê hate vedan.

Endamên saziyên sivîl, meclis, nûnerên partiyên siyasî, her wiha çalakgerên grevên birçîbûnê ku êlekên spî yên bi wêneyên Rêber Abdullah Ocalan li xwe kiribûn, tev li çalakiyê bûn.

Endama Înîsiyatîfa Gel Munîca Heyder berxwedana çalakgerên grevên birçîbûnê yên di zindanên dewleta dagirker a Tirk de di serî de berxwedana Rêber Abdullah Ocalan di zindana Îmraliyê de silav kir.

Munîce destnîşan kir ku siyaetên li dijî ciwanên gelê Kurd li girtîgehan tê kirin, berdewama siyaseta qirkirinê ya ji 80`î ve berdewam in û got: "Bi saya vîna xurt a ku Rêber Abdullah Ocalan di gelên şoreşger de çandiye, her girtiyek bûye volkan û her girtîgehek bûye qada têkoşîn û berxwedanê."

Munîce wiha pê de çû: "Em girêdana xwe ya bi îdeolojiya Rêber Abdullah Ocalan û piştgiriya xwe bi berxwedana çalakgerên grevên birçîbûnê yên di zindanan de radighînin û em destnîşan dikin ku heta azadiya fîzîkî ya Rêveberê me pêk neyê ku ji bo hemû gelên bindest azadî ye, em ê li ber xwe bidin."

Endamê Meclisa Malbatên Şehîdan a bajarê Qamişlo Masûm Hesen axivî û wiha got: "Felsefeya Rêbertî hêviya gelan e û jiyaneke azad û bi rûmet ji me re peyda kir, ji ber vê yekê Tirkiye tecrîdeke giran li ser wî ferz dike û hevdîtina bi wî re asteng dike."

Hesen wiha domand: "Em ê heta azadiya Rêberê mirovahiyê Abdullah Ocalan li meydanan bimînin, ji ber ku azadiya wî yekane rêya pêkanîna aştiyê li Rojhilata Navîn e û em ê heta şikandina dîwarên girtîgehên faşîst tê bikoşin."

Endamê Rêveberiya Desteya Çandê ya kantona Cizîrê Danîş Butan jî got: "Divê hemû endamên civakê û pêkhateyên herêmê li gorî felsefeya neteweya demokratîk û felsefeya Rêber Abdullah Ocalan têkoşînê li dijî polîtîkeyên tecrîd û tesfiyekirinê bilind bikin.”

Greva birçîbûnê dê heta roja înê dewam bike.

(şx)

ANHA