Bi rêbazên jiyana komînal li hemberî êrişan ber xwe didin

Di encama bombebarana balafirên şer û yên bêmirov de di navbera 13`ê û 15`ê Çileyê 2024 de, stasyonên kehrebeyê li piraniya navçe û bajarên kantona Cizîrê, stasyonên petrol û gaze li Tirbespiyê, Dêrik û Rimêlanê rawestiyan û şênî bê kehrebe, gaz û av man.

Bi vê rewşê re, Rêveberiya Xweseriya Demokratîk hewl da bi rêbazên alternatîf bîran bi rêya jeneratoran bixebitîne û gazê ji derve bîne.

Şêniyan jî li rex hewldanên Rêveberiya Xweser xwest li çareseriyan bigerin û pêdiviyên jiyanê yên bingehîn mîna av û kehrebeyê, peyda bikin.

Şênî bi giyanekî komînal bi hev re hewl didin bandorên êrişên dewleta Tirk a dagirker sivik bikin û însiyatîfan pêşkêş dikin.

Yek ji wan însiyatîfan, însiyatîfa şêniyên taxa Selahûdîn a navçeya Çilaxa ya kantona Cizîrê ye ku bi hev re li çareseriyekê ji bo ku kehrebeyê peyda bikin, geriyan û li hev kirin ku bi rêya Komîteya Xizmetguzariyê ya komîna taxê, jeneratorekê bikirin û li gorî pergala ampîran li şêniyên taxê belav kirin.

Hevserokê Komîna Taxa Selahûdîn Hisên El Şêx têkildarî mijarê got: "Ev bingeha karê komînê ye ku divê em xwe bispêrin xwe û çareseriyan ji aloziyên xwe re peyda bikin."

El Şêx wiha domand: "Me bi hev re ev biryar da û bi hev re torên kehrebeyê li malan bi cih kirin û me kesek erkdar kir, ji bo ku li ser xebitandina jeneratorê bisekine."

Jenerator kehrebeyê dide 200 malan. Para her malekê 5 ampîr e. Her wiha ji xwediyên dikanan re 7 ampîr hatin veqetandin.

El Şêx bang li şêniyan kir ku karê komînal bi pêş bixin ji bo ku pêdiviyên xwe peyda bikin û got: "Vîna me ji planên dewleta Tirk a dagirker xurttir e." 

ANHA