Bi çalakiyeke girseyî qurbaniyên komkujiya Ermenan bi bîr anîn

Li bajarê Qamişloyê bi armanca bîranîna qurbaniyên komkujiya Ermenan, çalakiyeke girseyî hat lidarxistin. Di çalakiyê de li dijî êrişan û komkujiyan peyama hevgirtinê hat dayîn.

ROJANE

23 nîsan, 2025 23:14

NAVENDA NÛÇEYAN

Bi boneya salvegera 110’an a komkujiya li dijî Ermenan ku ji aliyê Osmaniyan ve hatibû kirin, pêkhateyên bajarê Qamişloyê (Kurd, Ereb, Suryan, Asur, Êzidî) çalakiyeke girseyî li dar xist û qurbaniyên komkujiyê bi bîra anîn. Çalakî bi nimêj û xwendina dûayan dest pê kir û li taxa Wistayê jî meşeke meşaleyî li dar xist.

Meşa bi sedanan Ermenî, şêx, rûspiyên eşîran, oldarî, nûnerên Rêveberiya Xweseriya Demokratîk û Meclisa Sûriyeya Demokratîk (MSD) jî tev lê bûn, ji pêşiya peykarê li ser rêya Qawetî dest pê kir û li pêşiya Dibistana Îtîhad a taybetî bi dawî bû. Li vir hevserokê Partiya Yekitiya Suryanî Senherîb Bersum, cîgira hevserokên MSD’ê Canda Mihemed, Hevserokê Meclisa Qanûsaz a Rêveberiya Xweseriya Demokratîk a Kantona Cizîrê Hikmet Hebîb û bi navê QSD’ê axaftin hatin kirin.

Di axaftinan de qurbaniyên komkujiya li dijî Ermenan hatin bibîranîn. Ji bo rêgirtina li dûbarebûna komkujiyan banga xweparastin, rêxistinbûyî û hevgirtinê hatin kirin.

Piştî axaftinan der barê serpêhatiyên gelê Ermen de stran û şano hatin pêşkêşkirin, helbest hatin xwedin, her wiha peyama eşîrên Kurd a bi vê wesîleyê hat xwendin.

(bb)

ANHA