​​​​​​​Li Şehbayê dijî komployê konê çalakiyê hat vedan

Di çarçoveya çalakiyên şermezarkirina komploya navnetewî ya 9’ê Cotmeha 1998’an dijî Rêber Abdullah Ocalan hatibû destpêkirin de, li herêma Şehbayê konê çalakiyê hat vedan.

Kon li Qada Ajokaran a gundê Fafînê bi beşdariya sedan welatiyên şehba, Şêrawa, Til Rifet, koçberên Efrînê hat vedan. Di çalakiyê de rêvber û endamên KPC, Desteya Tenduristiyê, TEV DEM, û MSD ‘ê jî amade bûn.

Di çalakiya ku bi dirûşmeya, "Dîwarê Îmraliyê hilweşînin, cenga azadiyê ser bixin" hatiye organîzekirin de, wêneyên Rêber Abdullah Ocalan hatin hildan û dirûşmeya “Bê Serok jiyan nabe” hat berzkirin.

Têkildarî salvegera komployê di çalakiyê de bi zimanê Kurdî û Erebî daxuyanî hat xwendin.

Daxuyaniya Kurdî ji aliyê Hevserokê Desteya Perwerde û  Hîndekariyê Fadil Çawîş, ya Erebî ji aliyê Hevseroka Meclisa Zagonsaz a Şehbayê Muşîre Reşîd ve hat xwendin.

Di daxuyaniyê de berxwedana Rêber Abdullah Ocalan û çalakiyên dijî komplo û tecrîdê hatin silavkirin û hat destnîşankirin ku wê bi bi berxwedanê zindana Îmraliyê bê hilweşandin.  

 Di berdewama daxuyaniyê de hat gotin ku azadiya fîzîkî ya Rêber Abdullah Ocalan hedefa herî bingeh a gelên azadîxwaz e û wiha hat domandin: “Gelên ji Başûrê Afrîkayê heta Amerîkaya Latîn û Rojhilata Navîn ji bo azadiya fîzîkî ya Rêber Abdullah Ocalan serî hildidin. Ev yek nîşan dide ku Rêbertî hêviya mirovahiyê ye. Em ê jî wekî gelê Bakur û Rojhilatê Sûriyeyê heta azadiya fîzîkî ya Rêbertiyê pêk tê  li qadan bin. Divê her mirovek û welatparêzek li gorî diruşma ′Bê Serok Jiyan Nabe′ têkoşînê bilind bike."

Piştî daxuyaniyê li dengê Rêber Abdullah Ocalan hate guhdarkirin. Di çalakiyê de kesên ku Rêber Abdullah Ocalan dîtine axifîn û hestên xwe anîn ziman.

Li gorî bernameyê wê li bin konê çalakiyê helbest werin xwendin, berhemên hunerî werin pêşkêşkirin.

Çalakî wê sibe jî dom bike.

(zş/a)

ANHA