Şehîdê Hêzên Ewlekariya Hundirîn Mihemed Kindo hat oxirkirin

Bi sedan şêniyên Qamişloyê û gundên wê, cenazeyê endamê Hêzên Ewlekariya Hundirîn Mihemed Ehmed Kindo ku 5`ê Cotmehê di êrişên dewleta Tirk a dagirker de şehîd bibû, li Goristana Şehîd Delîl Saroxan a Qamişloyê oxir kir.

Tevî şêniyan, endamên Hêzên Ewlekariya Hundirîn, hevalên şehîd û malbata wî, nûnerên sazî û meclisên bajêr, Kongra Star, tevger û rêxistinên civaka sivîl û tevgerên ciwanan di merasîmê de beşdar bûn.

Di merasîmê de endama Meclisa Malbatên Şehîdan a Til Birakê, Weid Ilêwî axivî û sersaxî da malbatên şehîd û tevahî şehîdên topbarana dewleta Tirk a dagirker. Her wiha Weid sûcên dewleta Tirk a dagirker, êrişên wê yên li dijî navendên stratejîk, xizmetguzariyê û hedefgirtina welatiyan şermezar kirin.

Weid wiha domand: “Madem, em şopdarên şehîdan in, wê demê serkeftin para me ye. Em dê destkeftiyên wan biparêzin. Madem di damarên me de xwîna rûmetê diherike, em ê serî hildin û bi bin nakevin.”

Endama Rêveberiya Meclisa Malbatên Şehîdan a Qamişloyê Fatme El Casim jî hevgirtina gel li hember êrişên qirkirinê silav kir û got: “Em ji bo welatekî azad dixebitin wê demê, kesek nikare vîna me bişikîne û dê tevahî komployan têk bibin.”

Fatme diyar kir ku dewleta Tirk a dagirker ji êrişên xwe yên li dijî navendên stratejîk, armanc dike ku vîna şêniyan bişikîne û wiha anî ziman: “Em paşde gav navêjin. Em ê di oxira parastina welatê xwe de, li ber xwe bidin û tê bikoşin. Bila gelê me li hember êrişan serî hildin.”

Dûre, endamekî Meclisa Malbatên Şehîdan wesîqeya şehadeta şehîd xwend û radestî malbatê kir. Dawiyê girseya gel cenazeyê şehîd Kindo spart axê.

(şx)

ANHA