Li Helebê jî hêrsa li dijî êrişan

Bi pêşengiya Meclisa Malbatên Şehîdan, bi sedan şêniyên taxên Şêxmeqsûd û Eşrefiyê êrişên dewleta Tirk a dagirker ên li dijî Bakur û Rojhilatê Sûriyeyê şermezar kirin.

Meş ji pêşiya hola civînan a 8'ê Adarê ya li rojhilatê taxa Şêxmeqsûdê dest pê kir. Di meşê de pankartên bi nivîsên "Na ji dagirkirî û qirkirinê re", "Destê xwe ji Rojava bikişîne kujer Erdogan" û "Li hemberî êrişên qirkirin û tevkariyê em ê asta berxwedan û têkoşînê bilind bikin" hatin hildan. Her wiha dirûşmên şermezarkirina êrişan, banga hesabpirsînê ji sûcdaran û  xwedîderketina li şehîdan hatin berzkirin.

Meş li qada 7 Şehîdan rawestiya. Li vir hevseroka Meclisa Malbatên Şehîdan a Helebê Rewşen Mihemed axivî û soza şopandina rêya şehîdan da.

Rewşen Mihemed diyar kir ku êrişên dewleta Tirk  a dagirker bêçarebûna wê nîşan dide û got, rejîma Tirk bi van êrişan dixwaze ji rewşa xwe bireve û raya giştî bixapîne.  Rewşen anî ziman ku berdewama êrişên dewleta Tirk ên li ser Bakur û Rojhilatê Sûriyeyê dê bibe sedema vejandina şandeyên veşartî yên DAIŞ′ê.

Rewşen Mihemed bal kişand ser çalakiya fedaî ya endamên Tabûra Nemiran a li Enqereyê jî û got: "Çalakî bersiveke guncaw ji bo gefxwarinên dewleta Tirk a dagirker bû ku hîna binesazî û saziyên xizmetguzarî û kampan dike hedef."

Di dawiya meşê de beşdaran soz dan ku ew ê li hemberî êrişên dewleta Tirk a dagirker ên li ser herêmê hevgirtin û têkoşîna xwe xurt bikin.

(mh)

ANHA