Cenazeyê şehîd Ûsama El Salim hat veşartin

Cenazeyê şervanê QSD’ê Ûsama Ehmed El Salim ê 29’ê Îlonê di operasyona “Xurtkirina Ewlehiyê” de li Dêrazorê şehîd bû, bi merasîmkekê li Goristana Şehîdan a Tebqayê hat veşartin. Bi şêniyên Tebqayê beşdarî merasîmê bûn.

Merasîm bi deqeyeke rêzgirtin û torana leşkerî dest pê kir. Piştre bi navê QSD′ê ji fermandar Agirî El Mihemed axivî, soz da dayikên şehîdan ku ew ê destkeftiyên şehîdan û herêmê biparêzin.

Cîgirê hevserokatiya Meclisa Rêveber a Tebqayê Ebdulezîz El Esker jî got: "Me ji bo rizgarkirina gel û xaka xwe bi hezaran şehîd dane. Em ê teslîm nebin û em ê li ser soza xwe bin ku me bi şehîdên xwe re danye.′′

Ebdulezîz Eser di dawiyê de got: "Em ji Erdoganê dîktator re dibêjin tu çi bikî em gav paşde neavêjin, em ê şehîdan bidin heta serkeftinê pêk bînin û dagirkeriyê têk bibin."

Bi navê Rêveberiya Xweser a Bakur û Rojhilatê Sûriyeyê, hevserokê Desteya Kar û Barên Civakî Farûq El Maşî wiha axivî: "Me ji bo welatekî ewle û aram  bi hezaran şehîda dane. Ji bo têkbirina dagirkeran li ser xaka xwe em ê hîna jî berdêlên giranbuha bidin. Em ê destkeftiyên bi xwîna şehîdên leheng hatine bidestxistin, biparêzin. Dijmin bi êrişên xwe yên nemerd hewl didin îrade û rûmeta me têk bibin û şêwazê jiyana me xirab bikin. Em ji dijmin re dibêjin, em xwediyê vê xakê ne, em xwediyê vê dozê ne, ev xak xaka me ye û em ê li ser bijîn. Zarokên me hene parastina xaka me bikin. Her çiqasî rêbazên wê qirêj bin jî, hûn nikarin me bişkînin. Bizanibin; çawa me rêxistina DAIŞ′ê têk bir û welatê xwe ava kir,  hûn ê nikaribin girêdana me bi xaka me ve bişkînin.′′

Piştre endama Meclisa Malbatên Şehîdan Foza El Mihemed wesîqeya şehîd Ehmed El Salim xwend û radestî malbata wî kir. Cenazeyê şehîd bi dirûşma li Goristana Şehîdên Tebqayê hat veşartin.

(bb)

ANHA