Şêniyên Helebê ji bo Rêber Abdullah Ocalan meşiyan

Meclisa Malbatên Şehîdan a Helebê ji bo azadiya wî ya fîzîkî meşek li dar xist. Di nav de nûnerên saziyên sivîl û partiyên siyasî, bi sedan kes beşdar bûn.

Meş ji pêşiya hola civînan a li beşê rojava yê taxa Şêxmeqsûdê dest pê kir. Di meşê de wêneyên Rêber Abdullah Ocalan hatin hildan û bê navber dirûşma "Bê serok jiyan nabe" hat berzkirin.

Meş li ber navenda Şehîd Gelhat a li beşê rojhilatê taxê sekinî û deqeyeke rêz hat girtin. Endama Meclisa Giştî ya PYD′ê Valantîna Ebdo axivî û berxwedana 24 salan a Rêber Abdullah a li Îmraliyê silav kir.

Valantîna Ebdo got: "Rêbertî ramanek diyarî gelên azadîxwaz kir û heta niha li girtîgehê li ber xwe dide, ji ber vê yek rejîma Tirk tecrîda li ser wî girantir dike û têkiliyên wî bi derve re qut dike."

Valantîna anî ziman ku ruxmî astengiyan gel xwedî li Rêbertiya xwe derketiye û wiha dawî li axaftina xwe anî: " Bila dewleta Tirk baş bizanibe ku Rêbertî ne bi tenê ye, lê bi milyonan kes şopdarên wî ne û ramanê wî pêk tînin. Dîwarê Îmraliyê wê Rêbertî ji gel qut neke. Em ê bi berxwedan û îsrarê tecrîda li ser Rêbertiya xwe bişkînin. Rêbertî bi projeya xwe ya neteweya demokratîk li hemberî pergalên kapîtalîst û zîhniyeta desthilatdar rabûye."

(bb)

ANHA