Cenazeyê şehîd Bedran Ehmed li Amûdê hat veşartin

Endamê Hêzên Ewlekariya Hundirîn Bedran Selahedîn Ehmed 17′ê Îlonê li navçeya Amûdê dema erka xwe bi cih dianî, şehîd bû.

Endamên saziyên sivîl, meclis û Hêzên Ewlekariya Hundirîn jî di nav de, di sedan şêniyên navçeya Amûdê cenazeyê şehîd Bedran Ehmed li Goristana Şehîd Îsmaîl Hogir spart axê.

Girseya gel cenazeyê şehîd li çerxerêya Dirbêsiyê wergirt û bi karwanekî ber bi Goristana Şehîd Îsamîl Hogir ve bi rê ketin.

Li goristanê piştî deqeya rêzgirtinê, endamê Meclisa Malbatên Şehîdan a Amûdê Mistefa Omerî axivî û bal kişand ser fedakariyên ku şehîdan ji bo welat dane.

Omerî di dewama axaftina xwe de îşaret bi tevkariya PDK′ê ya bi dewleta Tirk a dagirker re jî kir û got, ′′Tevkariya bi dewleta Tirk a dagirker a dixwaze Kurdan tune bike, xiyanetek li Kurdistanê ye ku bi xwîna bi hezaran şehîdan hatiye avdan.′′

Mistefa Omerî soz da ku ew ê heta serketinê şopdarên xeta şehîdan û ramanê Rêber Abdullah Ocalan bin.

Bi navê malbata şehîd Bedran, apê şehîd Seîd Ferso soza şopandina xeta tevahî cangoriyên azadiyê da.

Piştre wesîqeya şehadetê ya şehîd Bedran Ehmed hat xwendin û radestî malbatê hat kirin. Cenazeyê şehîd bi dirûşmên dilsoziya bi şehîdan re hat veşartin.

(bb)

ANHA