'Dewleta Tirk dijberiya belgekirina dîroka jina azad dike'

Bi dehan endamên Kombûna Jinan a Zenûbiya, Platforma Çalakiyan a Tevger û Rêxistinên Jinan, Meclisa Jinan a Sûriyeyê û nivîsgehên jinan ên partiyên siyasî li ber avahiya Kombûna Jinan a Zenûbiya ya bajarê Reqayê kom bûn û têkildarî êrişên dewleta Tirk a dagirker daxuyaniyek bi raya giştî re parve kir.

Endama Koordînasyona Kombûna Jinan a Zenûbiya ya Reqayê Nesrîn El Hesen daxuyanî xwend.

Di daxuyaniyê de êrişên li ser herêmên Rêveberiya Xweser hatin şermezarkirin û hate gotin, Rêveberiya Xweser projeyeke exlaqî û demokratîk e ku mafên tevahî pêkhateyên diparêze.

Di daxuyaniyê îşaret bi êrişên domdar ên dewleta Tirk a dagirker ên li ser Bakur û Rojhilatê Sûriyeyê, bi taybetî êrişên li ser jinan hate kirin û wiha hat domandin: "Binpêkirin û êrişên hovane yên dewleta Tirk a dagirker li ser gelên Bakur û Rojhilatê Sûriyeyê, bi taybet li ser jinan dewam dikin. Dewleta Tirk bi hemû cureyên çekan û bi balafirên bêmirov ên biçek êrişên xwe li dijî têkoşer û parêzvanên welatên xwe didomîne. Tevî bertekên li hemberî van êrişan jî, lê heta niha me tu bersiv wernegirtine."

Di daxuyaniyê de hate gotin, dewleta Tirk a dagirker bi van sûcan îsbat dike ku dijberê belgekirina dîroka jinên azad e: "Hîna jî balafirên bêmirov ên biçek jinên me yên pêşeng û rêveber ên ku ji bo pêkanîna edalet, wekhevî, aştî û ewlehiyê tê dikoşin, dikin hedef. Dewleta Tirk bi vê yekê bes nedît, nûçegihan û rojnamevanên me yên ku dengê heqîqetê radighînin û tevahî sûcên plankirî yên ku dewleta Tirk a dagirker, teşhîr dikin, dike armanc. Dewleta Tirk bi van sûcan rastiya xwe keşif dike ku dijberî belgekirina dîroka jina azad e. Dewleta Tirk tevahî qanûn û pîvanên navneteweyî û azadiya derbirînê bin pê dike."

Di daxuyaniyê de hate gotin: "Dewleta Tirk a dagirker êrişeke hovane pêk anî. Bi balafireke bêmirov a biçek erebeya ekîba JIN TV'yê kir hedef. Di êrişê de xebatkarê JIN TV'yê Necmedîn Feysel şehîd bû û nûçegihan Delîla Egîd birîndar bû. JIN TV'yê rewşa civakî, siyasî, çandî û aborî ya jinan radighîne, tevahî binpêkirin û hemû cureyên tundiya ku li ser jinan têne kirine, belge dike.''

Platforma Çalakiyên Tevger û Rêxistinên Jinan bang li civata navneteweyî kir ku li hemberî sûcên dewleta Tirk a dagirker ji bêdengiya xwe derkeve û got, bêdengî binpêkirnên hovane rewa dike. Her wiha got, xebatên ji bo ragihandina dengê jina azad û pêkanîna edaletê wê dewam bikin.

(bb)

ANHA