Şêniyên Kobanê şehîdên komkujiya Kobanê bi bîr anîn

Şêniyên kantona Kobanê şehîdên komkujiya Kobanê li goristana şehîdan a Kobanê û ya gundê Berxbatanê bi pêxistina mûman li ser gorên wan bi bîr anîn.

NÛÇE

25 hezîran, 2023 19:45

KOBANÊ

Bi sedan şêniyên kantona Kobanê ji bo bîranîna şehîdên komkujiya “Şeva Xedrê” ya Kobanê û gundewarê wê berê xwe da Goristana Şehîdên Komkujiyê ya li ser rêya Cerablus û goristana şehîdên komkujiyê ya li gundê Berxbatanê.

Li goristanê Hevserokê Meclisa Malbatên Şehîdan Adil Hec Kerho axivî û got: "Em îro wan kesên ku xwedî têkiliyeke ruhî bi xaka xwe re bûn û bûn qurbanên DAIŞ`ê ku ajandeya dewleta Tirk a dagirker in, bi bîr tînin."

Kerho wiha domand: "Ji bo ku ev komkujî dubare nebe divê her kesek ji me xwe li hember vê xakê berpirs bibîne û xwe li gor şerê gel ê şoreşgerî bi rêxistin bike."

Di dawiya merasîmê de mûm li ser gorên şehîdên komkujiyê hatin pêxistin.

Hêjayî bibîrxistinê ye ku di 25'ê Hezîrana 2015'an de anku piştî 5 mehan ji têkbirina DAIŞ'ê li Kobanê, komkujiyek li Kobanê û gundê Berxbatanê pêk hat û di encamê de 243 sivîl û 30 şervanên Yekîneyên Parastina Gel (YPG) û Yekîneyên Parastina Jin (YPJ) şehîd bûn.

(mh/şx)

ANHA