Li Qamişlo meşa li dijî dagirkeriyê

Kongra Star li dijî êrişên dewleta Tirk a dagirker bi dirûşmeya "Rêxistinbûna jinan bersiva êrişên dagirkeriyê ye" meşek li dar xist. Bi sedan jinên bajêr, nûnerên rêxistin, saziyên jinan, saziyên sivîl û partiyên siyasî beşdarî meşê bûn.

Jinan ji Çerxerêya Şehîdên Enternasyonalîst a li bajêr dest bi meşê kir. Di meşê de bênavber dirûşmeyên şermezarkirina êrişan û dirûşmeya “Jin, Jiyan, Azadî” hatin berzkirin.

Meşvan li Goristana Şehîd Delîl Saroxan rawestiyan. Li wir Endama Rêveberiya Kongra Star Şaha Xelîl axivî. Şaha şehîd bi bîr anîn û got: "Helwesta jinan a li hember êrişên berdewam ên li ser herêm û rêveberiya me nayê guhertin.”

Şaha bal kişand ser êrişên li djiî jinên pêşeng û êrişa vê dawiyê ya li dijî Yusra Derwêş, Leyman Şiwêş û Firat Tûma û got: "Ev ne êrişa yekemîn e. Dewleta Tirk jinên pêşeng hedef digire. Ev jî parçeyek ji siyasetên qirkirinê yên li dijî jinan û şoreşa gel a li Bakur û Rojhilatê Sûriyeyê ye."

Şaha, bal kişand ser têkoşîna her sê şehîdan û wiha dewam kir: “Şehîd Leyman di oxira rizgariya gelê xwe û doza jinê de li tevahî parçeyên Kurdistanê 38 salan têkoşiya. Şehîd Yusra jî dayikeke hîndekar bû ku nifşê nû fêrî zimanê wan ê dayikê dikir. Şehîd Firat ê asûrî jî cihê xwe di Şoreşa Bakur û Rojhilatê Sûriyeyê (şoreşa biratiya gelan) de girt.”

Şaha diyar kir ku divê gelê herêmê li hember êrişan rêxistinbûna xwe xurttir bike, li gorî pêdiviyên pêvajoyê û pîvanên şerê gel ê şoreşgerî tevbigere.

Çalakî bi dirûşmeyên mîna "Berxwedan Jiyan e", "Şehîd namirin" û tilîliyên dayikan bi dawî bû.

(fr/c)

ANHA