Xelkê Til Temirê tecrîd û êrişên Tirkiyeyê şermezar kirin

Ji bo şermezarkirina tecrîda li dijî Rêber Abdullah Ocalan û êrişên dewleta Tirk ên li dijî Bakur û Rojhilatê Sûriyeyê Meclisa Navçeya Til Temirê meşeke girseyî li dar xist.

Xelkê navçeyê, endamên saziyên sivîl û leşkerî beşdarî meşê bûn. Di meşê de wêneyên Rêber Abdullah Ocalan  û wêneyên şehîdên komkujiya duh, hatin hildan.

Meş ji pêş navenda Meclisa Malbatên Şehîdan a Til Temirê dest pê kir û li tevahî kolanên sereke geriya. Li dawiya Kolana Filistîn meş vegerî mîtîngê. Li wir endamê Meclisa Giştî ya Partiya Yekitiya Demokratîk (PYD) Ebdurehman Hisên axivî û wiha got: "Em meşa girseyî ya bi beşdariya hemû pêkhateyên navçeyê, ji bo şermezarkirina tecrîda li dijî Rêbertî û êrişên dewleta Tirk ên li dijî Bakur û Rojhilatê Sûriyeyê hate lidarxistin. Beşdariya girseyî nîşaneya hevgirtina gelê herêmê li hember êrişan e."

Hisên destnîşan kir dewleta Tirk a dagirker êrişên xwe li dijî Bakur û Rojhilatê Sûriyeyê dijwar kirine, herî dawî jî êrişa li dijî hevseroka Meclisa Kantona Qamişlo, cîgira hevserokatiya meclisê û endamê meclisê bû.

Hisên diyar kir ku ev sûc û komkujiyên dewleta Tirk a dagirker li dijî xelkê Bakur û Rojhilatê Sûriyeyê pêk tîne, li pêş çavên cîhanê tevahî pêk tên.

Meş bi diruşmên silavkirina şehîdan û şermezarkirina êrişên dewleta Tirk a dagirker bi dawî bû.

(fr)

ANHA