Bi semînerekê bal kişandin ser xeteriya hişbirê

Semîner li avahiya meclisa kantona Qamişlo hat dayîn û bi dehan endamên Tevgera Ciwanên Şoreşger a Sûriyeyê, Yekitiya Jinên Ciwan, Meclisa Ciwanan a PYD′ê, endamên Desteya Ciwan û Werzîşê ya Herêma Cizîrê beşdarê bûn.

Endamê Hêzên Têkoşîna li dijî Hişbirê ya girêdayî Hêzên Ewlekariya Hundirîn a herêma Cizîrê Oliyar Mehmûd Xelîl semîner semîner bi rê ve bir. Xelîl di destpêka axaftina xwe de behsa sedemên belavbûna hişbirê di nava civakê de kir û got: "Hişbir di serdema kapîtalîzmê de bi pêş ketiye, xeterî û bandora wê zêdetir bûye. Li dijî civakan weke çekeke veşartî tê bikaranîn."

Xelîl destnîşan kir ku dewletên dijberî projeya Rêveberiya Xweser a Bakur û Rojhilatê Sûriyeyê madeyên hişbir belav dikin û wekî gaveke destpêkê ciwanan dikin hedef û wiha domand: “Ji ber ku ciwan dîmanîka civakan in. Kesên ku hişbirê bi kar tînin hêza wan namîne û nikarin roleke aktîf di avakirina civaka xwe de bilîzin.”

Di dewama axaftina xwe de Oliyar Xelîl behsa rola ciwan û malbatan di têkoşîna li dijî hişbirê de kir û got: "Malbat nûnertiya xeta yekemîn a parastina civakê ne. Bêyî malbatê dê ev têkoşîn kêm bimîne."

Xelîl her wiha behsa rêbazên hişyarî û dermankirinê, çawaniya gihandina nifşekî nû yê bi tendurist û ji hişbirê parastî kir û anî ziman ku divê semîner û panelên hişyariya li ser hişbirê bên lidarxistin, navnedên tenduristiyê yên taybet bi dermankirina kesên hişbirê dibin were avakirin.

Beşdaran jî nêrînên xwe li ser mijarê anîn ziman û diyar kirin ku divê civak hevgirtî be da ku çareyên lezgîn ji bo vê pirsgirêkê bên dîtin û rê li belavbûna hişbirê bê girtin.

(fr/c)

ANHA