Bi hezaran kesî şehîdên Qereçoxê bibîr anîn

Bi hezaran şêniyên herêma Cizîrê, nûnerên Rêveberiya Xweseriya Demokratîk a Herêma Cizîrê, rûspiyên herêmê û endamên saziyên sivîl, berê xwe da çiyayê Qeremoxê û şehîdên Qereçoxê bi bîr anîn.

Dewleta Tirk a dagirker 25`ê Nîsana 2017`an êrişî çiyayê Qeremoxê yê Dêrikê kiribû û di encamê de 20 şervan û 3 rojnamevan şehîd bûbûn.

Piştî êrişê, bi hezaran şêniyên Bakur û Rojhilatê Sûriyeyê berê xwe dabû Qereçoxê û Rêveberiya Xweser 25`ê Nîsanê wek Roja Şehîdan ragihandibû.

Îro li lûtkeya çiyayê Qereçoxê, merasîmek ji bo bîranîna şehîdan li dar ket.

Di merasîmê de endama Meclisa Malbatên Şehîdan a Herêma Cizîrê Cewahir Osman axivî û diyar kir ku dewleta Tirk û dewletên hevkarên wê, bi êrişa li dijî Qereçoxê, xwestin vîna gelê Bakur û Rojhilatê Sûriyeyê têk bibin.

Cewahir destnîşan kir ku gelê herêmê wê demê xwedî li şehîdên xwe derket û bi sekna xwe ya têkoşer îsbat kir ku ew li hember êrişan mertal in û vîna wan bi şehadeta zarokên xwe xurttir dibe.

Ji fermandarên YPJ`ê Nesrîn Ebdullah axivî û şehîdên Qereçoxê bi bîr anîn û got: “Hêzên me yên leşkerî vîn, moral û hêza xwe ji malbatên hevalên xwe digirin. Em dê bi vî ruhî û vînê li hember tevahî hewldanên hedefgirtina gelê herêmê têk bibin.”

Nesrîn Ebdullah destnîşan kir ku çiyayê Qereçoxê veguheriye keleha berxwedan û têkoşînê û soz da gelê Bakur û Rojhilatê Sûriye û şehîdan ku têkoşînê berdewam bikin.

 (şx)

ANHA