Şêxê qebîleya El Welde daxwaza azadiya fîzîkî ya Rêber Abdullah Ocalan kir

Şêxê qebîleya El Welde a Tebqayê Hamid El Ferec ji ajansa me re axivî, tecrîda li dijî Rêber Abdullah Ocalan şermezar kir û wekî derqanûnî wesif kir. El Ferec got: "Tu dewleteke li cîhanê bi vê şêweyî nêzîkî girtiyan nabe. Lê dewleta Tirk di girtîgehên xwe de hemû qanûn û mîsaqan û mafên mirovan binpê dike."

El Ferec wiha domand: "Ev demeke dirêj e em banga pêkanîna azadiya fîzîkî ya Rêber Abdullah Ocalan dikin. Me ji bo bidawîkirina tecrîdê û pêkanîna azadiya fîzîkî ya Rêber Abdullah Ocalan, bang li hemû deste û aliyên têkildar kir ku rêgezên edalet û mafên mirovan pêk bînin."

El Ferec anî ziman ku herî dawî bi rêya Însiyatîfa Gel a Bakur û Rojhilatê Sûriyeyê û Însiyatîfa Azadiya Rêber Abdullah Ocalan a Sûriyeyê ku tê de zêdetirî 2 milyon îmze hatibûn komkirin, ev daxwaza xwe anîne ziman.

El Ferec bal kişand ku dewleta Tirk a dagirker hemû daxwazan red dike, tecrîda li ser Rêber Abdullah Ocalan girantir dike û zêdetirî 2 salan in nahêle ne parêzer ne jî malbat pê re hevdîtinê bikin û got: “Bêdengiya rêxistinên mafên mirovan li hember van kiryaran, hevkariya wan bi dewleta Tirk re nîşan dide.”

Hamid El Ferec bang li hêzên navneteweyî û rêxistinên hiqûqî kir ku qanûnan bi cih bînin û got: "Dê bang û daxwazên me heta pêkanîna azadiya fîzîkî ya Rêber Abdullah Ocalan dewam bikin."

(fr/c)

ANHA