Gerîlayê HPGʹê Rustem Efrîn li Şehbayê hat bibîranîn

Meclisa Malbatên Şehîdan a Herêma Efrînê ji bo gerîlayê HPGʹê Alî Adnan Şêr (Rustem Efrîn) yê ku 3'ê Cotmeha 2020ʹî li Amanosê şehîd bûbû, merasîmê bîranînê li qada kampa Berxwedan a navçeya Fafînê ya kantona Şehbayê li dar xist.

Wêneyên Rêber Abdullah Ocalan, wêneyên şehîdên êrişên kîmyewî yên dewleta Tirk a dagirker û alên Meclisa Malbatên Şehîdan bi kon ve hatin daliqandin.

Di merasîma ku bi dehan şêniyên Efrîn û Şehbayê beşdar bûbûn de, endama Meclisa Malbatên Şehîdan a Herêma Efrînê Sureya Hebeş axivî.

Sureya Hebeş seraxî ji malbata şehîd re xwest û li ser êrişên kîmyewî yên dewleta Tirk a dagirker got: "Dewleta Tirk bi bikaranîna çekên kîmyewî dixwaze moralê gel û gerîlayên parêzvanên mafên rewa yên li çiyayên Kurdistanê bişkîne."

Sureya Hebeş tecrîda girankirî ya li ser Rêber Abdullah Ocalan û bêdengiya rêxistinên mafên mirovan a li hemberî îşkenceya li Îmraliyê şermezar kir anî ziman ku destê NATOʹyê di tecrîdê de heye.

Piştî axaftinan, mamoste Şêrîhan Hemo nasnameya şehîd xwend û radestî malbatê kir.

Merasîm bi berzkirina dirûşmên dilsoziya bi şehîdan re û silavkirina berxwedana gerîla bi dawî bû.

(bb)

ANHA