​​​​​​​Şêniyên Reqa çalakiya konvedanê dest pê kir

Şêx û rûspiyên eşîran, Meclisa Sivîl a Reqayê, Meclisa Malbatên Şehîdan û Komîteya Tenduristiyê beşdar bûn. Her çalakî dê 2 rojan dewam bike.

Bi navê Meclisa Qanûsaz a Reqayê, endamê meclisê şêx Mihemed El Bohebal axivî û got: “Rast bedenê serok girtiye lê ew nekarin li hember gelê ku hêza xwe ji rêber wergirtiye û felsefeya wî ji xwe re kiriye çirûska azadî û rûmetê bisekinin. Em bang li NY'yê û tevahî gelê demokratxwaz dikin ku zextê li dewleta Tirk bikin ku rêber Abdullah Ocalan ji girtîgehê Îmralî derxe.”

Cîgirê Hevserokê Komîteya Tenduristiyê Reşad Mihemed da zanîn ku ew îro li hember dagirkeriya Tirk û tevahî desthilatdarên cîhanê sekinîn û azadiya fîzîkî ya rêber Abdullah Ocalan dixwazin û wiha domand: “Heke xeyal dikin ku bi dîlgirtina rêberê me dê tevgerên azadiyê tune bikin, hûn şaş in, ji ber ku yên xwedî li fikir û felsefeya rêber Abdullah Ocalan derdikevin, bi xwe Ocalan in û tu carî fikrê Ocalan tune nabe."

Hevserokê Meclisa Malbatên Şehîdan Ehmed El Hemûd jî wiha axivî: “Em bang li rêxistinên mafên mirovan û rêxistinên navnetewyî dikin ku azadiya fîzîkî ya rêber Abdullah Ocalan pêk bînin ku doza wî bûye dozeke navnetweyî.”

El Hemûd di dawiya axaftina xwe de wiha anî ziman: “Dewleta Tirk dixwaze doza rêbertî wisa xuya bike ku dozeke tenê ya gelê kurd e. Lê belê pêkhateyên herêmê yên Kurd, Ereb, Suryan, Asûr û Çerkez, doza rêber Abdullah Ocalan, wek doza hemû gelan dibînin ku banga azadî û avakirina civakeke demokratîk dikin.”

Her wiha biryar e ku sibe şandeyên din serdana çalakiya konvedanê bikin.

(dm)

ANHA