​​​​​​​Oldaran bombebarankirina cihên olî şermezar kir

Dewleta Tirk a dagirker di 30′yê Mijdarê de mizgefta gundê Tirwaziyê yê navçeya Silokê ya li rojhilatê Girê Spî kir hedef, di encamê de beşeke mezin ji mizgeftê wêran kir.

Girêdayî mijarê, serokê Meclisa Olî ya Hesekê Mihemed Reşîd Ebdulezîz êrişên dewleta Tirk a dagirker li dijî herêmê bi giştî û hedefgirtina cihên olî bi taybet şermezar kirin û got: "Dewleta Tirk a dagirker bi rêya êrişên xwe yên hovane li dijî herêmê, bombebarankirina mizgeftan û cihên olî sûcan pêk tîne."

Ebdulezîz wiha domand: "Tu girêdana dewleta Tirk a dagirker bi ol û îslamê ve tune ye, lê belê Erdogan bi rêya êrişên xwe yên li dijî herêmê hewl dide beriya hilbijartinan dengan qezenc bike."

Li aliyekî din jî metranê herêmên Cizîr û Firatê yê Suryanên Ortodoks, Mar Morîs Emsîh diyar kir ku Bakur û Rojhilatê Sûriyê di qonaxeke hestiyar û zehmet re derbas dibe û got: "Dewleta Tirk a dagirker dêr û mizgeftên li hemû herêmê û welatiyan dike hedef."

Emsîh êrişên dewleta Tirk a dagirker ên li dijî herêmê şermezar kirin û wiha domand: "Armanca dewleta Tirk a dagirker ji hedefgirtina dêr û mizgeftan herêmê vala bike, pêkhateyên wê koçber bike û rûbera dagirkeriya xwe fireh bike."

Emsîh di dawiyê de bang li rêxistinên mirovî û yên mafên mirovan kir ku êrişên dewleta Tirk a dagirker ên li dijî Bakur û Rojhilatê Sûriyê û gelê wê bisekinînin.

(fr)        

ANHA