Şêniyên Şedadê şehîdekî xwe oxir kir

Bi dehan şêniyên navçeya Şedadê cenazeyê şervanê Hêzên Erka Xweparastinê Kemal Subhî El Hemed oxir kir, ku 13`ê Mijdarê di êrişa balafira bêmirov û biçek a dagirkeriya Tirk de şehîd bûbû.

Beşdarên merasima oxirkirinê cenazeyê şehîd ji pêşiya Meclisa Malbatên Şehîdan a Hesekê wergirt û piştre bi dehan erebeyan berê xwe da goristana şehîdan a navçeya Şedadê.

Li goristanê, şervanên Hêzên Erka Xweparastinê toraneke leşkerî pêşkêş kir.

Piştre endama Meclisa Malbatên Şehîdan Îman El Ferec sersaxî da malbata şehîd û got: "Şêniyên herêmê wê têkoşînê bidomînin, dagirkeran biqewitînin û herêmên dagirkirî rizgar bikin."

Ji fermandarên Hêzên Erka Xweparastinê jî Ebdulsetar Hesekê axivî û got: "Dewleta Tirk balafirên bêmirov ên biçek li dijî şêniyên herêmê bi kar tîne, da ku wan bide koçberkirin. Lê belê bi saya berxwedana şêniyan û hêzên leşkerî em ê heta dawiyê hemû planên Tirkiyê vala derxin."

Piştî axaftinan wesîqeya şehîd hat xwendin û radestî malbatê hat kirin û di nava tilîliyên dakiyan de cenazeyê şehîd Kemal spartin axê.

ANHA