Xerîb Hiso: Birêxistinbûna li gorî şerê gel ê şoreşgerî dê planên dijmin têk bibe

Hevserokê TEV-DEM'ê Xerîb Hiso geşedanên dawîn ên li herêmê nirxandin. Bi taybet jî kontrolkirina kantona Efrînê ya dagirkirî ji aliyê Heyet Tehrîr El Şam ve û dorpêça girankirî ya ku ji aliyê hikumeta Şamê ve li ser kantona Şehbayê û taxa Şêxmeqsûd a bajarê Helebê tê ferzkirin.

Hiso têkildarî mijarê ji ANHA'yê re axivî û got: "Veguhastina çeteyên El Nusra ji bo Efrînê, yek ji encamên civîna Tehran û Astanayê bû ku hemwextî nêzîkbûna dewleta Tirk bi hikumeta Şamê re ye. Ev yek jî ji bo derbasbûna qonaxeke nû ya taktîkên şer û pêşxistina planeke nû ya şerê li dijî Rêveberiya Xweser, lawazkirina wê û têkbirina modela neteweya demokratîk e." 

Têkildarî armancên hikumeta Şamê ji dorpêçkirina kantona Şehbayê, Hiso wiha got: "Vê dorpêçê ferz dike da ku zextê li koçberên Efrînê bike û vîna wan bişikîne. Her wiha dixwaze wan ji devera ku jê li dijî dewleta Tirk a dagirker li ber xwe didin da ku herêmên xwe biparêzin, koçber bike. Ev yek ji polîtîkayên hevpar ên dewleta Tirk a dagirker û hikumeta Şamê ya di bin sîwana Rûsyayê de ye.”

‘BI RUHÊ BERXWEDAN Û TÊKOŞÎNÊ EM Ê PLANÊN DIJMINAN TÊK BIBIN'

Hiso got ku îhtîmal e êrişên li ser Bakur û Rojhilatê Sûriyê bi rêya çekên giran û balafirên bêmirov ên biçek, her wiha bi rêya şerê taybet zêde bibin û wiha lê zêde kir: "Li gorî şopandina me ya ji rewşê re, tevahiya herêmên Bakur û Rojhilatê Sûriyê di bin xetereya dewleta Tirk a dagirker û hikumeta Şamê de ne. Ne dûr e ku êrişên li ser herêmê zêde bibin, bi taybet li herêmên Şehbayê, her wiha hemû rê ji aliyê hikumeta Şamê ve werin girtin."

Hiso her wiha got: "Teqez dê tevahî gelên azadîxwaz ên Bakur û Rojhilatê Sûriyê, hemû planên dijminan têk bibin."

'DIVÊ GEL AMADE BE'

Hevserokê TEV-DEM'ê Xerîb Hiso wiha bang li gel kir: "Divê li hember her rewşeke awarte di amadebaşiyê de be û ber bi rizgarkirina Efrînê ve biçe. Pêwîst e destpêkê em baweriya xwe bi hêza xwe, hebûna xwe û bi rêveberiya xwe ya xweser ku bi saya fedakariya şehîdan hatiye avakirin, bînin."

Hiso herî dawiyê wiha got: "Pirsgirêk bi koçberiyê çareser nabin, ev di serî de planên dijmin e. Birêxistinbûna gel a li ser prensîba şerê gel ê şoreşgerî ku li Şehbayê pêk tê û tevî hemû şert û mercên zehmet, mayîna wan a li wir, cihê rêz û hurmetê ye."

(hs)

ANHA