Bi hezaran şêniyên Dêrikê komploya 9ʹê Cotmehê şermezar kir

Bi boneya salvegera 24’an a destpêkirina komploya navneteweyî ya li dijî rêber Ocalan ku di 9’ê Cotmeha 1998’an de pêk hatiye, bi hezaran şêniyên herêma Dêrik, Girkê Legê, Çilaxa û Til Koçerê daketin qadan. Di dema meşê de hemû dikan hatin girtin.

Şênî ji Qada Azadî dest bi meşê kir û bi berzkirina diruşmeyên "Bijî berxwedana rêbertî", "Bimire faşîst Erdogan" û "Hilweşe komploya navneteweyî" di nava kolanên navçeya Dêrikê de geriyan.

Di meşê de wêneyên rêber Ocalan û pankartên "Hemû cureyên îxanet û komployê têk bibin, rêber Apo bi fîzîkî azad bikin" hatin vekirin.

Meş li ber bi navenda Şehîd Bawer a Tevgera Ciwanên Şoreşger a Sûriyê veguherî mîtingê

Li wir endamê Meclisa Partiya Yekitiya Demokratîk (PYD) ya herêma Cizîrê Seîd Sîpan axivî û diyar kir ku dewletên hegemon û mêtînger di odeyên tarî de civiyan û plana komploya li dijî rêber Ocalan danîn.

Sîpan wiha domand: "Em bi hemû gotinên tund û tûj komployê şermezar dikin. Ev komploya ku di şexsê ronakbîr û fîlozofê neteweya demokratîk Abdullah Ocalan de pêk hatiye, li dijî gelên herêmê ye."

Sîpan destnîşan kir ku ew e ê heta misogerkirina azadiya fîzîkî ya rêber Ocalan tê bikoşin.

Sîpan da zanîn ku kombûna wan a li vê qadê nîşaneya girêdana bi fikir û felsefeya rêber Ocalan e, her wiha nîşaneya têkoşîna van gelan a ji bo rizgarkirina fîzîkî ya rêber Ocalan, têkbirina komployên li dijî rêbertî û gelên herêmê ye û wiha anî ziman: "Dewletên hegemon û kapîtalîst li ser derketina rêber Ocalan ji Sûriyê li hev kir, da ku wî bigirin û radestî dewleta Tirk bikin û di encamê de fikir û felsefeya wî ya li dijberî siyasetên wan ên qirêj, têk bibin."

Seîd Sîpan wiha dawî li gotina xwe anî: "Bi hêz û vîna dayikên şehîdan, gel û pêkhateyên herêmê ku xwe spartine fikir û felsefeya rêber Ocalan, em ê têkoşînê geş bikin."

Mîting bi diruşmeyên silavkirina berxwedana rêber Ocalan bi dawî bû.

(fr)

ANHA