Partiya Sûriya Pêşerojê girêdayî geşedanên siyasî panelek li Minbicê li dar xist

Endamên saziyên sivîl ên Rêveberiya Sivîl a Demokratîk a Minbicê, nûnerên partiyan, rûspiyên herêmê tev li panelê bûn ku li hola Navenda Çand û Hunerê ya bajêr, li dar ketiye.

Di panelê de sekretera giştî ya Partiya Sûriya Pêşerojê Sîham Dawûd axivî û rewşa siyasî nirxand û şîrove kir.

Sîham Dawûd diyar kir ku Erdogan hewl dide di sala 2023`yan de gelek destkeftiyan bi dest bixe û got: “Lê nîşaneyên li ser erdê diyar dikin ku 2023`ê dawiya AKP`ê ye. Bi taybet ji ber rewşa aborî ya li welêt û kêmbûna alîgirên hikumeta Erdogan.”

Sîham Dawûd daxuyand ku Erdogan dixwaze gelê Tirk bixapîne ku dikare her du pirsgirêkan çareser bike ya yekê penaberan û ya din lihevhatina bi hikumeta Şamê re. Her wiha bi bîr xist ku şertên hikumeta Şamê diyar in ew jî derketina Tirkiyê ji Sûriyê û rawestandina piştgiriya terorê ye.

Di dawiyê de Sîham Dawûd got: “Hikumeta Erdogan jî şert danîn, jê ya herî girîng dijminatiya QSD û Rêveberiya Xweser. Heke lihevkirina Edene were vejandin jî lê her du jî hikumeta Şamê û Erdogan nikarin li ser van şertan li hev bikin.”

Serokê Nivîsgeha Ragihandinê ya partiyê Miwefeq El Ehmed behsa cureyên şer û bandorên wan li ser gelan kir û got: “Li dijî herêmê bi taybet li ser sînor, şerekî derûnî  û çapemenî tê meşandin. Gelek şer li herêmê diqewimin, nexasim li herêmên Til Rifet û Minbicê.”

El Ehmed diyar kir ku şerê derûnî yê li dijî herêmê, parçekirina civakê armanc dike da ku bi hêsanî were kontorlkirin û ev li gotinên xwe zêde kir: “Ew hewl didin me bikin kole û vîna me kontrol bikin. Ji bo em bibin dijminê hev, fitne û derewan belav dikin.”

El Ehmed gotinên xwe wiha bi dawî kir: “Encamên van hewldanan li ser gelên me yên li herêmê û bi taybet li Minbicê ne nû ne, lê belê plankirî ne û jê armanc heye ku civak parçe bibe û dûrî exlaqê bimîne.”

(dm)

ANHA