Çalakiya konvedanê ya li ber avahiya NY'yê bi komeke nû dewam dike

Çalakiya konvedanê ya bi diruşmeya "Kanî dadmendiya we?" ya li ber avahiya Komîseriya Bilind a Penaberan a Neteweyên Yekbûyî (NY) a li bajarê Qamişlo di roja xwe ya 13'an de dewam dike. Çalak ji aliyê HPC û Kongra Star ve ji bo şermezaririna êrişên dewleta Tirk a dagirker ên li ser herêmê û bêdengiya civata navneteweyî ya li hemberî van êrişan hatiye lidarxistin.

Îro bi dehan şêniyên navçeya Til Koçer a girêdayî Kantona Qamişlo, endamên Kongra Star, endamên komîteya civakî ya navçeyê û Komîteya Şilêr ya karûbarên zarokan li Qamişlo, berê xwe dan çalakiya konvedanê. 

Kon bi wêneyên zarokên ku di encama êrişa balafirên bêmirov û bi çek ên dagirkeriya Tirk li ser herêmê, şehîd û birîndar bûne, alên Kongra Star, alên Yekîneyên Parastina Gel (YPG) û Yekîneyên Parastina Jin (YPJ'ê), her wiha pankartên "Na ji dagirkeriyê re", "Kanî dadmendiya we?" û "Bê Serok Jiyan Nabe", hatiye xemilandin 

Di çalakiyê de ji aliyê endama Kongra Star a navçeya Til Koçer Emel El Celûd ve daxuyanî hate xwendin.

Kongra Star a navçeya Til Koçer êrişên berdewam ên dagirkeriyê yên dewleta Tirk ên li ser Bakur û Rojhilatê Sûriyê û komkujiyên hovane ên li ser sivîlan şermezar kir û diyar kir ku ew kiryareke tirsonek, bêexlaq û dermirovî ye.

Kongra Star her wiha bêdengiya navneteweyî û nepabendbûna welatên garantor bi sozên wan ve, şermezar kir û wiha got: "Em sersaxiyê ji malbatên şehîdan re dixwazin. Dewleta Tirk çi bike jî wê nikaribe vîna me bişkîne û me ji rêya azadî û demokrasiyê derxîne. Bedel çi dibe bila bibe, em ê hebûn û nasnameya xwe biparêzin. 

Em banga girtina qada hewayî dikin. Em bang li gelê xwe jî dikin ku li dijî êrişên li ser xak û gelê me, li kêleka hêzên leşkerî bisekinin. Em sozê didin şehîdan ku em ê rêya wan di bin ala wan de bişopînin, heya rizgarkirina xaka bav û galên me ji gemariya wan, em ê paşve gav neavêjin. Şert û merc çi qas zor bibin jî, em ê heya serkeftinê têkoşîna xwe xurt bikin. Bê guman serkeftin a me ye, serkeftin a me ye, serkeftin a me ye."

Piştre endamê Meclisa Navçeya Til Koçer Salih Kino diyar kir ku sedema hatina wan ji bo çalakiya konvedanê ew e ku nîşanî cîhanê bidin ka "terorîst" kî ye û got: "Em li vir in da ku em dengê xwe bighînin vê cîhana bêdeng, da ku em ji cîhanê re îsbat bikin terorîstê rast kî ye, gelo terorîst ew e yê ku parastina xak û rûmeta xwe dike? Yan jî terorîst ew e yê ku hemû mafê mirovan bin pê dike, jin û zarokan dikuje, malan xirab dike û ev hemû li ber çav û guhê tevahî cîhanê ye."

Salih Kino her wiha diyar kir ku gelên Bakur û Rojhilatê Sûriyê bi hemû pêkhateyên xwe ve wê piştgiriya hêzên xwe bikin û li ser fikir û felsefeya rêber Abdullah Ocalan bin û wiha got: "Bi Hêzên Sûriya Demokratîk re em ê serkeftinê bi dest bixin û xaka xwe ji dagirkeran rizgar bikin."

Ji aliyê xwe ve, rêvebera qada civakî ya Kantona Cizîrê Nîda El Salih êrişên dewleta Tirk ên li ser Bakur û Rojhilatê Sûriyê şermezar kir û got: "Em îro dibînin ku balafirên bêmirov ên bi çek ên dewleta Tirk bê ti astengî, tirs û qanûnan li ser herêmên me difirin, gelo ev bêdengiya navneteweyî tirs e yan jî lihevhatin e, yan jî ev dagirkerî xizmeta berjewendiyên piraniya welatan dike?"

Derbarê helwesta "dewletên garantor" û rêxistinên mafên mirovan de jî Nîda El Salih got ku ev pirsekê ava dike ku ew jî "Çima em bi taybet, gelê Bakur û Rojhilatê Sûriyê ku li dijî terorê şer kirin dibin hedef, ma gelo zarok jî terorîst in!"

Nîda El Salih di dawiya axaftina xwe de destnîşan kir ku gelên Bakur û Rojhilatê Sûriyê dê piştgiriya xwe ya ji bo hêzên leşkerî bidomînin û wiha got: "Eger pêwîst bike em ê hemû di çeperan de bin, em ê li ber xwe bidin, em ê şer bikin, em ê bibin bombe." 

(hs)

ANHA