Şêniyên Bakur û Rojhilatê Sûriyê şehîd Ferhad Şiblî bi bîr anî

Têkoşer Ferhad Şiblî di 17`ê Hezîrana borî de li herêma Kelara ya parêzgeha Silêmaniye ya Başûrê Kurdistanê di êrişa balafireke bêmirov a biçek a dagirkeriya Tirk de şehîd bûbû.

Malbata şehîd Ferhad Şiblî, ji bo bîranîna wî merasîmek li Goristana Şehîd Xebat Dêrik li dar xist. Nûnerên saziyên civaka sivîl, partî û desteyên Rêveberiya Xweser a Bakur û Rojhilatê Sûriyê tev li merasîmê bûn.

Di merasîmê de hevseroka Partiya Yekitiya Demokratîk (PYD) Asya Abdullah axivî û di kesayeta şehîd Ferhad Şiblî  de hemû şehîdên azadiyê bi bîr anîn. Asya Abdullah topbarana li ser herêmên Başûrê Kurdistanê û Bakur û Rojhilatê Sûriyê û hedefgirtina têkoşeran şermezar kir.

Asya Abdullah wiha domand: “Hovîtiya dewleta Tirk a dagirker îsrara me ya berxwedanê û şopandina têkoşînê li dijî sûcên dagirkeriya Tirk zêde dike.”

Cîgirê hevserokatiya Bakur û Rojhilatê Sûriyê Gebrîyel Şamon axivî û soza berdewamkirina rêya şehîdan, rêya têkoşînê û azadiyê da.

Di merasîmê de hevserokê Meclisa Rêveber a Rêveberiya Sivîl a Minbicê Mihemed Xêr Şêxo axivî û got: “Şehîd Ferhad Şiblî biçûya ku derê, li wir ken di nava gel de belav dikir. Yên ku wî nas kirine, ji bo giyanê wî yê têkoşer, xwîn digiriyan.”

Şêxo wiha pê de çû: “Gelên Bakur û Rojhilatê Sûriyê û hevalên şehîd Ferhad berxwedan û tolhildan wek erk ji xwe re diyar kirin. Ev jî soza me ye ku em tola şehîdan ji dagirkeran hilînin.”

Dayîka şehîd Ferhad Şiblî Şîrîn Omer axivî û bixêrhatina beşdaran kir û teqezî bi berdewamkirina rêya şehîd Ferhad heta pêkanîna xewna wî da.

Piştî bidawîbûna axaftinan, beşdaran baxên gulan danîn ser gora şehîd Ferhad Şiblî.

ANHA