Ciwanên Suryan li dijî êrişên dewleta Tirk xwepêşandan li dar xist

Pêkhateyê Suryan li navçeya Til Temir a Hesekê li ser bangewaziya ciwanên Suryan xwepêşandanek bi dirûşma “Na ji bazarên navneteweyî re yên ji bo qirkirina gelên herêmê” li dar xist.

Xwepêşandan ji çerxerêya Şehîd a navçeyê destpê kir û li ber çerxerêya Qendîl rawestî û veguherî mitîngê. Di mitîngê de hevseroka Tevgera Ciwanên Suryan a Pêşverû Miryana Îsa daxuyanî da.

Di daxuyaniyê de hat destnîşankirin ku dewleta Tirk a dagirker hêzên xwe kom dike û dest bi propagandaya operasyoneke leşkerî li dijî Bakur û Rojhilatê Sûriyê kir, bi armanca têkbirina ewlehî, hevgirtina gelên herêmê û derxistina tevliheviyê, vejandina dewleta Osmanî û kontrolkirina çaresernûsa gelan.

Di daxuyaniyê de hat destnîşankirin ku dewleta Tirk a dagirker bi rêya guhertina demografiya herêmê hewl dide van armancan pêk bîne, mîna li Xabûr, Til Temir, Serêkaniyê û Girê Spî û gelek herêmên din kiriye.

Her wiha di daxuyaniyê de hat teqezkirin ku dewleta Tirk a dagirker bi serkêşiya AKP`ê ji êrişan armanc dike, gelê Suryan û Asûr bide koçberkirin mîna beriya 100 salî kiriye dema komkujiyên Sefo li dijî gelên Suryan û Asûr pêk anîn.

Di daxuyaniyê de wiha hat gotin: “Ciwan dê hertim piştgiriya hêzên leşkerî bikin û tev lê bibin da ku herêmê biparêzin. Em îro ji bo piştgiriya hêzên xwe yên leşkerî û ewlehî; Meclisa Leşkerî ya Suryan, Hêzên Sotoro, Hêzên Parastina Jin Bîs Nehrîn li vir in ku bi lehengî ev ax û gelên xwe yên Suryan û Asûr parast.”

Di daxuyaniyê de siyasetên dagirkeriya Tirk ên li dijî herêmê û hemû cureyên dagirkirin û mêtingerî yên li dijî gelên herêmê hatin şermezarkirin.

Di dawiya daxuyaniyê de bang li rêxistinên mirovî û hiqûqî hat kirin ku ji bêdengiya xwe derkevin, helwestan nîşan bidin da ku sûcên dagirkeriya Tirk li dijî herêmê rawestînin, şêniyên resen vegerin warên xwe û çareseriya siyasî li gorî biryara NY`yê ya bi hejmara 2254 çalak bibe.

(dm)

ANHA