​​​​​​​Parlamentereke iraqî bang li hikumetê kir ku dawiyê li binpêkirinên dewleta Tirk bîne

Parlamentera Hevbendiya Fetih Suheyle Sultanî diyar kir ku li pêşiya Iraqê gelek rê hene ku dawî li binpêkirinên dewleta Tirk a dagirker bîne û êrişên wê yên li hundirê Iraqê rawestîne. Suheyle daxuyand ku hevpeyman û lihevkirinên heq bide Tirkiyê ku serdestiya Iraqê binpê bike û xaka wê dagir bike, tune ne.

Suheyle Sultanî ji ajansa El-Malûme re axivî û eşkere kir ku mafê dewleta Tirk nîn e ku êrişî xaka Iraqê bike, parçeyekî jê dagir bike û li hundirê sînorê Iraqê baregehên leşkerî ava bike.

Suheyle Sultanî wiha axaftina xwe dewam kir: "Tirkiye nikare xwe bispêre Peymana Lozanê bi taybet piştî avakirina Neteweyên Yekbûyî, hilweşîna Împaratoriya Osmanî, ji nû ve diyarkirina sînorên welatan û mîsogerkirina wan sînoran bi rêya peymanên navneteweyî.”

Parlamentera iraqî anî ziman ku divê Iraq berê xwe bide Dadgeha Edaletê ya Navneteweyî û rêxistinên din da ku hesab ji dewleta Tirk bixwaze û li ser ziyanên gihandine Iraqê, berdêlê bide.

Dewleta Tirk bê navber serdestiya xaka Iraqê binpê dike, êrişan li dijî welatiyan pêk tîne û bi hezaran dar li Geliyê Pisaxa û Şeşdaran ên ser bi Zaxoyê ve li jêr çavdêriya hêzên PDK’ê û Parêzvanên Sînor, birîn.

Li gorî agahiyên ku xelkê herêmê dane ajansa Rojnewsê, artêşa Tirk bi destê cerdevanan li aliyê Bakur û Başûrê Kurdistanê bi tonan daran dibire. Hate gotin ku herêma li ser sînor bi temamî ji daran hatiye rût kirin û heya niha jî darbirîna li herêmên Şeşdaran û Geliyê Pisaxa berdewam e.

Gundiyên herêmê diyar kir tu hêzek destwerdan li rewşê nake û heya niha bi sedan wesayîtên barhilgir yên tijî dar anîne geliyê Pisaxa û ji wir jî derbasî bajarê Şirnexê tên kirin.

Heya niha jî ne Komîsyona Jîngehê ya Parlamentoya Herêma Kurdistanê, ne hikumeta Başûrê Kurdistanê û ne jî tu rêxistineke sivîl li ser vê qirkirina xwezaya Kurdistanê helwest nedaye nîşandan û ji bo lêkolînê neketiye nava tevgerê.

Berpirsê Malbenda YNK’ê ya Mûsilê Xeyaz Sûrçî jî da zanîn ku şîrketên Tirk li ser daxwaza hêzên Tirk bi armanca bazirganiyê darên li Başûrê Kurdistanê dibirin û bazirganiyê pê dikin.

Sûrçî da xuyakirin şîrketên Tirk li ser daxwaza hêzên Tirk, hinek daran dibirin û gelek darên cureyên wan kêm têne dîtin jî tên birîn û firotin.

(eh)