​​​​​​​Peyama rojnamevanên destgîrkirî: AKP-MHP nikarin ji karê me re bibin asteng

Li Amedê ji 8’ê Hezîranê ve 20 jê rojnamevan, 21 kes hatine destgîrkirîn.

Hevserokê Komeleya Rojnamegeran a Dîcle Firatê Serdar Altan û edîtora JINNEWS’ê Gulşen Koçûk bi rêya parêzerên xwe peyam şandin.

Di peyama Serdar Altan de hate gotin: “Desthilat hebûna xwe bi veşartina rastiyan a ji gel didomîne. Ji ber wê yekê dezgehên çapemeniyê dikin hedef. Desthilata AKP’ê û MHP’ê bi van operasyonan hewl dide bêhiqûqiyên xwe, pêkanînên derveyî mirovahiyê ji gel veşêrin. Bi destgîrkirin û girtina rojnamevanan ragihandina rastiyan a ji gel re nikare were astengkirin. Kevneşopiya çapemeniya azad bi van pêkanînên derveyî hiqûqê nikarin bên bêdengkirin. Kevneşopa çapemeniya azad her tim rastî got û wê ji niha şûnde jî rastiyan bibêje. Rojnamevanî ne sûc e.”

Edîtora JINNEWS’ê Gulşen Koçak jî wiha got: “Desthilat û daraz her çi qas bi ser kevneşopa çapemeniya azad de werin jî dixwazin destnîşan bikim ku em li ser pêyan e. Em ji rastiyan hêzê digirin. Desthilata AKP’ê û MHP’ê bi daraza xwe bi helwest û pêkanînên xwe nikare ji karê me re bibe asteng. Em rojnamevan in. Desthilat û daraz nikare karê me diyar bike. Nikarin biryar bidin ku em rojnamevan in an ne rojnamevan in. Bi gotina wan a ‘ne rojnamevan in’ em ji rojnamevaniyê dernakevin. Rojnamevaniya jin a Kurd gaveke nû destnîşan kir. Jinnews ajanseke jinan e ku li Tirkiyê û Rojhilata Navîn bi awayekî xurt rojnamevaniya jinê dike. Roja ku rojnamevaniya jin a Kurd xwe bi rêxistin dike ve desthilat zextê li rojnamevanên jin dike. Yek ji sedemê van operasyonan jî ev e. Ez dixwazim careke din destnîşan bikim ku karê em dikin û rêya me rast e û em ji vê yekê bawer in.”