'Biryara Belçîkayê rastiya PKK'ê careke din nîşan da'

Konseya Dozên Biyaniyan a Belçîkayê der barê PKK'ê de biryar da û got, PKK'ê ne rêxistineke terorîst e.

Li ser vê mijarê parêzer Xalid Îbrahîm got, ji destpêka dîrokê ve û heta roja îro kurdan êrişî tu kesî nekirine û di têkoşîn û rizgariya xwe de teror li dijî tu kesî pêk neaniye, lê belê her tim parastina gelê Kurd, maf, çand, dîrok û hebûna wî dike.

Xalid Îbrahîm diyar kir ku hêzên navneteweyî û herêmî li dijî kurdan plan û komplo pêk anîn, Kurd jî neçar man ku parastina nirxên xwe bikin, ji ber wê jî diviyabû ku helwestek li dijî plan û êrişan derkeve da ku parastina hebûna xwe ya dîrokî li Rojhilata Navîn bike.

Xalid Îbrahîm îşaret pê kir ku divê mijara ku ''PKK`ê partiyeke terorîst e yan na'' neyê nîqaşkirin û anî ziman ku PKK`ê nûnertiya kurdên ku li azadiyê digerin û têkoşerên ji bo hebûnê, dike.

Têkildarî hinceta qanûnî ku PKK`ê weke partiyeke terorîst pênase dikin, Xalid Îbrahîm ev tişt anî ziman: "Ji ber tu tiştekî zelal û erêkirin têkildarî pênaseya terorê tune ye. Teror çi ye? Kî terorîst in? Pênaseya terorê encama hin siyaset û peymanan bû. Ev pênase li her dewletekê ji ya din cûda ye. Her dewletekê pênaseyekê li gorî berjewendî û siyasetên xwe  û têkoşîna gelan li wê dewletê daniye da ku serdestiya xwe li ser wan gelan ferz bike."

Xalid Îbrahîm diyar kir ku gelek caran zimanê hiqûqî dikeve bin bandor û xizmeta siyasetê û wiha domand: "Heger dadgeheke serbixwe di dozekê de biryar bide ku aliyek teror e yan na, wê demê nikare bêje ku îsbata hatiye pêşkêşkirin raste yan na. Ew belgeyan dixwîne û li gorî wê biryar dide weke ku çawa li dadgeha Belçîka û Konseyên Dozên Biyanî ya Belçîkayê pêk hat."

Îbrahîm destnîşan kir ku zimanê siyaset û edaletê pir ji hev cûda ne, têgeh û pênaseyeke zelal ji siyaset û edaletê re tune ye û wiha axivî: "Qanûna Urdunê ji qanûa Sûriyê cûda ye. Ya Sûriyê ji ya Misirê cûda ye. Her dewlet û sîstemek pênaseyekê li gorî siyaset û edaleta ji bo mayîna li ser serdestiyê datîne."

Xalid Îbrahîm behsa xistina navê PKK`ê ji "lîsteya terorê" re kir û got: "Tu çalekiyeke terorî di dîroka gelê Kurd de tune ye. Ji ber ku ev gel ji bo mayîna xwe û mafên xwe yên hatine standin têdikoşe. Ew jî ji bo parastina hebûn, dîrok, çand û nirxên wî ye. Mirov nikare bêje ku PKK`ê ya ku dîroka kurdan û Rojhilata Navîn şîrove û nirxandiye ku terorîst e."

' PKK`Ê LI ROJHILATA NAVÎN VEGUHERTIYE TEVGEREKA GELÊN AZADÎXWAZ'

Xalid Îbrahîm anî ziman ku PKK`ê niha li Rojhilata Navîn veguheriye tevgera gelên azadîxwaz, nûnertiya gelê Kurd û gelên Rojhilata Navîn dike, ji ber wê jî mirov nikare bêje ku ev partiya têkoşer terorîst e.

Xalid Îbrahîm da zanîn ku PKK`ê di hemû warên siyasî, civakî, exlaqî û aborî de têdikoşe, ev têkoşîn nûnertiya têkoşîna gelên Rojhilata Navîn dike û tawanên terorê yên li dijî PKK`ê tê wateya tawanbarkirina hemû gelên Rojhilata Navîn bi terorê.

Xalid Îbrahîm got PKK`ê nûnertiya nasnameya gelê Kurd, gelê Kurd li Bakur û Rojhilat, Rojava û Başûrê Kurdistanê dike, ji bo hebûna xwe têdikoşe û berdêlên giran dide, ji ber wê jî mijara ku ev gel teror e yan na nabe ku were nîqaşkirin û nîqaşkirina vê dozê pir şerm e.

Xalid Îbrahîm anî ziman ku têkoşîna gelê Kurd têkoşîneke rewa ye û ev tişt got: "Di hemû pîvan û qanûnên navneteweyî de têkoşîna ji bo parastin, nasname û hebûnê têkoşîneke rewa ye. Helwestên ji hin dadgehên ewropî mîna Belçîkayê baş e û bandorê dê li dewletên din bike."

Parêzer Xalid bi van gotinan dawî li axaftina xwe anî: "Tawanbarkirina gelê Kurd bi terorê di kesayeta PKK`ê de tawaneke siyasî ye. Niha jî ev yek di qadên navneteweyî de tê îsbatkirin. Kurdên li Bakur û Rojhilatê Sûriyê, Başûrê Kurdistanê û Şengalê şerê terorîstên cîhanî di kesayeta çeteyên DAIŞ`ê de, kir."

(bx)

ANHA