Rûspiyên eşîrên Dêrazorê li dijî dagirkeriya Tirk banga hevgirtinê kir

Şêx û rûspiyên eşîrên Dêrazorê, di civîna ku li dîwana serokeşîrê Bûxabûr, Ednan Şibilî de, beşdar bûn. Herwiha bi dehan şêx û rûspiyên ku nerazîbûna xwe li hember êrişên dewleta Tirk a dagirker nîşan dan, tev li civînê bûn.

Di civînê de, beşdar banga yekgirtina gelê kirin û ku nakokiyên xwe bidin aliyekî û berjwendiya gel di ser her tiştî re bigirin.

He  rwiha daxuyaniya serokeşîr û rûspiyên eşîrên Dêrazorê,  ji aliyê serokeşîrê Enayze, Mihemed El-Sistanî ve hate xwendin.

Di daxuyaniyê de hate gotin: “Em wek rûspî, rewşenbîr û karkerên Dêrazorê, hebûna hêzên biyanî, di serî de artêşa Tirk a dagirker, Rûsya û milîsên Îranê şermezar dikin û hemû cureyên gefan ên li dijî gelê me yê berxwedêr red dikin. Em guh nadin çapemeniya dijmin a derwîn.”

Di daxuyaniyê de bang li koalîsyon û civaka navneteweyî hate kirin ku sînorekê ji sûcên li dijî gelê Sûriyê re deynin, her wiha ku xwedî li berpirsiyariya xwe ya mirovahî û exlaqî derkevin û hemû hêzên dagirker ji Sûriyê derxin. Her wiha hate gotin: “Sûriyê dê bibe yek welat, yek gel û yek xak bi hemû pêkhateyên xwe.”

Serokeşîr û rûspiyên eşîrên Dêrazorê rola qehremanî ya QSD’ê silav kirin û teqez kirin ku divê ew bibe beşeke sereke di çareseriya krîza Sûriyê de; “QSD’ê ewlehî li herêmê peyda kir û ji bo pêkanîna aşitî û aramiyê li Bakur û Rojhilatê Sûriyê qurbanî dan, ji ber wê jî divê ew bibe beşeke sereke di çareseriya kirîza Sûriyê de. Em li dijî êrişên dagirkeriya Tirk in a ku dixwaze împratoriya kujer a Osmanî vejîne.”

Di dxuyaniyê wiha hate domandin: “Em razî nabin ku ev dagirkirin ji nû ve were û em daxwaz dikin biryara navneteweyî ya 2254 pêk were û rê li ber komên çekdar yên ku dixwazin ji aliyê dewleta Tirk a dagirker ve têkevin xaka Sûriyê, were girtin û ji bo herêm ji şerekî dijwar û giran were parastin. Yên ku aşitî û aramiyê pêk tînin û hemû aliyan digihînin hev, em bi wan re ne.”

Rûspiyên eşîrên Dêrazorê bang li sûriyan kir ku azadî û demokrasiyê li Sûriyê pêk bînin û wiha dawî li daxuyaniyê anîn: “Em bang li her kesekî birûmet û welatparêz dikin ku yekitiyekê ava bikin û nakokiyan li ser bingeha berjewendiyên kesayetî deynin aliyekî û berjewendiya gel bikin asta herî pêş da ku ewlehî, azadî û demokrasiyê li Sûriyê misoger bibin.”

ANHA