Şehîdê HRE'yê Fedekar bi merasîmeke girseyî hate oxirkirin

Bi hezaran welatiyên herêma Efrînê cenazeya şervanê Hêzên Rizgariya Efrînê (HRE) Elî Beşîr (Fedekar) ê di qonaxa duyemîn a Berxwedanê Serdemê de şehîd bibû, ji pêşiya nexweşxaneya Avrîn a navçeya Fafînê wergert û berî dan Goristana Şehîdên Berxwedana Serdemê ya li navçeya Ehrizê.

Merasîma oxirkirinê bi rêzgirtinê dest pê kir, paşê Meclisa Malbatên Şehîdan a Herêma Efrînê nasnameya Fedekar Heleb ê di qonaxa yekem a berxwedana serdemê de şehîd bibû eşkere kir.

Li ser navê Meclisa Malbatên Şehîdan a herêma Efrînê Xedîce Îbo axivî û sersaxî ji malbatên her du şehîdan re xwest.

Xedîce Îbo got: "Êrişên artêşa Tirk a dagirker dewam dikin, piştî ku par li Avaşîn bi binket, careke din di 17'ê Nîsanê de dest bi êrişeke din a dagirkeriyê kir. Armanca dewleta Tirk dagirkirina herêmên kurdan e."

Xedîce Îbo diyar kir ku bi saya fedekariya şehîdan û girêdana gel bi têkoşîn û berxwedanê ve, dê hemû komplo û planên qirkirina gelê Kurd û gerîla têk biçin.

Li aliyê din endamê Meclisa Kantona Efrînê Ehmed Selama hevkariya PDK'ê ya bi dewleta Tirk re şermezar kir û got, PDK'ê agahiyên derbarê cihên gerîla de dide artêşa Tirk a dagirker.

Selama di dawiyê diyar kir ku ew ê weke welatiyên Efrînê li ser şopa şehîdan û fikrên rêber Ocalan bimeşin û rê nedin armancên dagirkeriya Tirk û hevkarên wê pêk werin.

Di dawiyê de endama Komîteya Perwerdeya Civaka Demokratîk a herêma Efrînê Ruha Nûh Kûsa nasnameya şehîdan  xwend û radestî malbatên wan kir.

Cenazeya şehîd Fedekar bi tilîliyên dayikan û berzkirina siloganên dilsoziya bi şehîdan re hat veşartin.

ANHA