Li kampa Holê hejmarek çeteyên DAIŞ hatin girtin

Li Kampa Holê duh pevçûn di navbera Hêzên Ewlekariya Hundirîn û şaneyeke çeteyên DAIŞ'ê de qewimî. Li kampê hîna jî tevlîhevî heye.

NÛÇE

29 adar, 2022 09:08

HESEKÊ

Nûçegihanê me li kampa Holê ya li rojhilatê bajarê Hesekê ragihand ku Şaneyeke çeteyên DAIŞ'ê duh êrişî hundir Kampa Holê bi taybet beşa pêncemîn kir û di encamê de pevçûn di navbera Hêzên Ewlekariya Hundirîn û çeteyan de qewimî.

Têkildarî mijarê, endamekî Rêveberiya Hêzên Ewlekariya Hundirîn a kampa Holê Îbrahîm Mihemed ji ajansa me re got: "Dema ku hêzên me erka xwe pêk dianîn rastî êrişa şaneyekî çeteyên DAIŞ'ê hatin."

Îbrahîm Mihemed piştrast kir ku ji ber ku di kampê de jin û zarok hene, Hêzên Ewlekariya Hundirîn bi baldarî tevdigerîn û di encamê de hejmarek ji çeteyan girtin. Lê hejmar diyar nekir.

Şaneyên çeteyên DAIŞ'ê di êrişê de bombeya RBG bi kar anîn, di encamê de zirar gihaşt 3 wesayîtên leşkerî yên Hêzên Ewlekariya Hundirîn.

Hêzên Ewlekariya Hundirîn xebatên xwe yên lêkolînê di beşa pêncemîn a kampê de berdewam dikin û li kampê û navçeya Holê bi giştî qedexeya derketina derve heye.

(dx)

ANHA