Li Bakur û Rojhilatê Sûriyê 8'ê Adarê bi coşeke mezin hat pîrozkirin- HATE NÛKIRIN

Bi diruşma "Bi hev re em şoreşa xwe biparêzin û xaka xwe rizgar bikin" bi sedan şêniyên Qamişlo bi hemû pêkhateyên wê 8'ê Adarê Roja Jinan a Cîhanê li Stada Heysem Kiço pîroz kirin.

Qada şahiyê bi wêneyên rêber Abdullah Ocalan, wêneyên şehîdan, alên Kongra Star, PYD û YPJ'ê hate xemilandin.

Şahî bi deqeyeke rêzgirtin dest pê kir. Paşê karnavaleke ji aliyê Koma Serdem ve hate pêşandan û daxuyaniya Platforma Çalakiyên Hevpar ên Rêxistin û Tevgerên Jinan ên Bakur û Rojhilatê Sûriyê ji aliyê endama rêveber a Kongra Star Îbtîsam El-Hisên ve hate xwendin. Her wiha peyama Fermandariya Giştî ya YPJ'ê ya bi boneya 8'ê Adarê hate xwendin.

Piştre hunermend Nesrîn Botan û Koma Delîla stran gotin. Ji aliyê koma Koçerat û Koma Til Birakê ve govendên folklorî hatin pêşandan.

Pîrozbahî bi gerandina xelekên govendê ji aliyê beşdaran ve li ber stranên şoreşgerî û gelêrî bi dawî bû.

AMÛDÊ

Li navçeya Amûdê jî bi sedan jinan, Roja Jinan a Cîhanê li Girê Moza pîroz kir. Jin ji hemû pêkhateyên navçeyê, di nav de endamên Kongra Star û saziyên civaka sivîl beşdarî şahiyê bûn.

Şahî bi deqeyeke rêzgirtin dest pê kir. Ji rêveberên Partiya Sûriya Pêşerojê Şîlan Ehmed axivî, 8'ê Adarê li hemû jinên cîhanê û rêber Ocalan pîroz kir û got: "Jin roleke mezin di hemû qadan siyasî, civakî û leşkerî de dilîze. Li ser vî esasî divê em têkoşînê heta dawiyê berdewam bikin."

Piştî axaftina Şîlan Ehmed stran bi zimanê kurdî, erebî û îngilîzî hatin pêşkêşkirin û şanoyek b navê "Daykê" hate pêşandan.

Pîrozbahî bi xelekên govendê bi dawî bû.

TIRBESPIYÊ

Jinên navçeya Tirbespiyê jî 8'ê Adarê bi coşeke mezin li Bendava Mizgeftê hate pîrozkirin. Pîrozbahî bi deqeyeke rêzgirtin dest pê kir. Paşê endama Platforma Çalakiyên Hevpar ên Tevger û Rêxistinên Jinan ên Bakur û Rojhilatê Sûriyê Buşra Xelîl axivî, 8'ê Adarê li tevahî jinên têkoşer pîroz kir.

Paşê, Koma Cûdî, Koma Şehîd Evîn a ji Til Hemîsê, Koma Şehîd Rêwan û Koma Şehîd Xebat stran pêşkêş kirine. Di dawiyê de ji aliyê beşdaran ve govend hatin gerandin.

ÇILAXA

Li Çilaxa jî, Platforma Çalakiyên Hevpar a Tevger û Rêxistinên Jinan ên Bakur û Rojhilatê Sûriyê şahiya 8'ê Adarê li hola Roj li dar xist.

Şahî bi rêzgirtinê dest pê kir. Ji rêveberên Kongra Star ên navçeya Çilaxa Nezha Seyfedîn axivî û got: "Jin wê têkoşîna xwe li hemberî siyasetên bi armanca çewisandina nasnameya wê, berdewam bike."

Nezha Seyfedîn banga xurtkirina têkoşîna avakirina civakeke demokratîk kir.

Di dawiya şahiyê de Koma Til Koçer govendên folkorî gerandin.

GIRKÊ LEGÊ

Bi sedan jinên navçeyên Girkê Legê û Til Koçer ên kantona Qamişlo 8'ê Adarê li Stada bajarokê Rimêlan pîroz kir.

Di şahiyê de endama rêveber a Kongra Star a Girkê Legê Semîra Yûsif axivî, 8'ê Adarê li hemû jinan pîroz kir.

Piştre li nirxandinên rêber Ocalan ên derbarê rola jinan di civakê de û girîngiya ku jin xwe ji bo avakirina civakeke demokratîk birêxistin bikin, guhdar kirin.

Di pîrozbahiyê de endama Meclisa Malbatên Şehîdan a Til Koçerê Fatima Elî jî îşaret bi têkoşîn û fedekariyên jinên Bakur û Rojhilatê Sûriyê kir.

Her wiha endama rêveber a Polîtburoya Partiya Rêkeftina Demokratîk a Kurd-Sûriyê Canda Yûsif Xelef axivî û got: "Jinan bi nasnameya xwe ya civakî ya aktîv karibû çanda dayika xwedawend bidomîne. Di şoreşa Bakur û Rojhilatê Sûriyê de jinan karibûn qeydên civakê bişkînin û ji bo azadiya xwe gavên mezin avêtin."

Piştî axaftinan komên hunerî yên girêdayî navenda Çand û Hunerê ya Mihemed Şêxo stran gotin.

HESEKÊ

Li navçe û bajarên kantona Hesekê jinan bi cil û bergên xwe yên folklorî 8'ê Adarê bi diruşma "Bi hev re em şoreşa xwe biparêzin û xaka xwe rizgar bikin" pîroz kirin.

Şêniyên bajarê Hesekê li devera Sedê "Bendava Rojava", şêniyê Til Temir li qada Malbatên Şehîdan û şêniyên Dirbêsiyê jî li navenda Çandê 8'ê Adarê pîroz kir.

Qadên pîrozbahiyê bi alên Kongra Star, YPJ, YPG, wêneyên şehîdên Bakur û Rojhilatê Sûriyê hate xemildanin.

Şahî bi deqeyeke rêzgirtin dest pê kir, paşê daxuyaniya Platforma Çalakiyên Hevpar ên Rêxistin û Tevgerên Jinan ên Bakur û Rojhilatê Sûriyê ji aliyê enadma Koordînasyona Kongra Star a Hesekê Lîlav Hesen, endama Kongra Star a Dirbêsiyê Darîn Îsan û endama Kongra Star a Til Temirê Madlîn Ubeyd ve hate xwendin.

Di şahiya li Hesekê de daxuyaniya Fermandariya Giştî ya YPJ'ê ji aliyê ji fermandar Guvenda Qamişlo ve hate xwendin.

Di pîrozbahiya li Til Temirê de ji fermandarên Meclisa Leşkerî ya Til Temirê Zîlan Til Temir axivî û got: "Her kes dizane ku jinan pêşangtiya şoreşa Rojava dikin û berdêlên giran didin. Ev hemû berhemên fikir û felsfeya rêber Ocalan e. Jin roj bi roj têkoşînê xurt dikin."

Zîlan Til Temir her wiha got: "Di mewziyên şer de jinan xwe bi rêxistin kirin. Her wiha di hemû qadên şoreşê de cih digirin û ji bo rakirina tariyê li ber xwe dan, têkoşîna wan hîna berdewam e."

Zîlan Til Temir anî ziman ku ew YPJ û Meclisa Leşkerî ya Til Temirê dê ji bo parastina destkeftiyên şoreşê xeta berxwedanê dewam bikin.

Şahî li her sê deveran stran, dîlan û şano ji aliyê komên Ereb, Kurd, Suryan û Ermenî bi dawî bû. Beşdaran li ber stranan govend gerandin.

KOBANÊ

Li Kobanê jî jinan 8'ê Adarê bi diruşma "Em bi hev re şoreşa xwe biparêzin û xaka rizgar bikin" li daristana Kobanê pîroz kir. Cihê şahiyê bi wêneyên jinên têkoşer ên şehîd û wêneyên rêber Ocalan hate xemilandin.

Şahî bi deqeyeke rêzgirtinê dest pê kir, dûvre endama Koordînasyona Kongra Star a herêma Firatê Roza Kobanê axivî û wiha got: "Jinê xwe îsbat kir û qeydên ji hêla zihniyeta baviksalariyê ve li ser hatibû ferzkirin, şikand. Bi vîna xwe hemû astengî derbas kir. Da ku azad bibe."

Roza Kobanê wiha domand: "Ji bo garantiya maf û azadiya xwe, jinan li her derê cîhanê têkoşiya û rastî zilm û bindestiyê hat. Ji ber vê yek rêber Ocalan di fikir û felsefeya xwe de bal kişand ser wê û banga mafên wê kir. Jinan jî bi qasî vê berpirsiyariyê derketin û bendên tirsê şikandin û bû rêveber û siyasetmedar.''

Ji fermandarên YPJ’ê ya Meclisa Leşkerî ya Kobanê Dîlara Kobanê îşaret bi asta ku jin di vê serdemê de gihaştiye kir û wiha got: "Jin îro bi fikrê rêber Ocalan bi çek bûye û benda koletiyê derbas kir. Tişta li herêmên Bakur û Rojhilatê Sûriyê pêk tê, nîşaneya vê yekê ye. Her wiha jin civakê ber bi ewlehiyê ve bi rêya siyasetê û bi rêya xendekên şer bi rê ve dibe. Ji lew re tirsa li ser jina azad û têkoşer tune ye. "

Koma Tevgera Hîlala Zêrîn a Sirîn şanoyek li ser vîna jinan pêşkêş kir, her wiha koma dayikan a navenda Baqî Xido stranên folklorîk pêşkêş kir û Koma Stêra Zêrîn a ji Cizîrê hatiye û koma zarokan stranên şoreşgerî yên kurdî pêşkêş kirin.

Dûvre gelek jinên rêveber ên saziyên herêma Firatê ji hêla Kongra Star ve hatin xelatkirin. Piştre dîlan li ber strana hunermed Cîhan Helenc hat gerandin.

MINBIC

Bi beşdarbûna bi hezaran jinên ji Minbic, Reqa, Tebqa û Kobanê beşdarî pîrozbahiya 8'ê Adarê bûn ku li gundê Toq Xelîl ê başûrê rojavayê bajarê Minbicê hate lidarxistin.

Di pîrozbahiyê de stran, şano û dîlanên ji hêla Komîteya Çand û Hunerê ya Minbicê hatin pêşandan. Her wiha hunermend Qemer Ferîc stranên şoreşgerî, koma Şehîd Arîn govendên kurdî pêşkêş kirin, hunermend Zeyneb Îshaq stranên çerkesî pêşkêş kirin.

Her wiha helbestvan Mezlûm Kobanê helbest bi zimanê kurdî pêşkêş kir, koma şano ya Minbicê jî şanoyek bi sernavê "Qêrîna gerê" pêşkêş kir.

Piştre hunermend Munallah a ji Reqayê stran. Koma Şehîd Botan govendeke tirkmenî û koma çand û hunerê ya Reqa govenda folklorî, her wiha hunermend Evîn Bîlal a ji Efrîn stranên kurdî pêşkêş kirin. Komîteya Amdekar jî komên beşdar xelat kirin.

HELEB

Girêdayî mijarê kongra Star li herêma Şiqeyêf a taxa Şêxmeqsûdê ya Helebê şahiyek li dar xist. Tê de komên hunerî stran, govend û şano hatin pêşkêşkirin.

Di pîrozbahiyê de koma Şehîd Vejîn û koma Şehîd Şîlan ên Tevgera Hîlala Zêrîn a Helebê stran û govend pêşkêş kirin. Koma Şehîd Nûjiyan a Yekitiya Jinên Ciwan govendek li dar xist. Her wiha komên Kevneşopî ya Şehbayê gelek stranên gotin.Endama Koordînasyona Kongra Star a Helebê Valatîna Ebdo axivî û wiha got: "Rizgarkirina xaka dagirkirî erka li ser tevahî jinên Sûriyê ye. Jinên Heleb û Sûriyê bi giştî deyndarê fikrê rêber neteweyî Ocalan e ku cihê rêveber û pêşengtiyê di şoreşa 19’ê Tîrmehê de da jinê. Wê jî di tevahî aliyan de xwe îsbat kir. "

Valantîna Ebdo anî ziman ku Roja Jinan a Cîhanê berhema têkoşîn û berxwedana bi milyona jinên têkoşer, tevger û rêxistinên jinan ên li tevahî cîhanê ye.

ŞEHBA

Pîrozbahiya 8'Adarê ya li gundê Elûş ê navçeya Ehdasê yê Şehbayê bi çalakiyên hunerî yên Tevgera Tîlala Zêrîn a Kantona Efrînê û gerandina xelekên govendê bi dawî bû. Pîrozbahî bi beşdarbûna bi hezaran şêniyan bi diruşma  "Bi hev re em şoreşa xwe biparêzin û xaka xwe rizgar bikin" bi deqeyeke rêzgirtin dest pê kir. Paşê nirxandinên rêber Abdullah Ocalan hatin guhdarkirin. Di şahiyê de koma Şehîd Berçem a stran û dîlanan, koma Şehîd Mizgîn a Stranan û koma Çiyayê Kurmênc a dîlanên folklorî, koma Şehîd Nûjiyan Zerdos a stranan, koma Şehîd Viyan Soran a jinên ciwan a dîlanan hunerên xwe pêşkêş kirin. Her wiha endama Tevgera Hîlala Zêrîn a Kantona Efrînê Fatima Bîlal stranên gelerî yên kurdî û erebî gotin. Koma Şehîd Heyfa û Şehîd Bêrîtan stranên şoreşgerî gotin. Di dawiyê de endamên Tevgera Tîlala Zêrîn Mufîde Hemdî û Zîlan Xelîl stran. Beşdaran li ber stranan govend gerandin. DÊRIK Bi hezaran şêniyên bajarê Dêrik û herêmên Koçerat û Beravê Roja Jinan a Cîhanê li Navenda Şehîd Bawer a Ciwanên Şoreşger pîroz kirin. Şahî bi deqeyeke rêzgirtin dest pê kir. Piştre daxuyaniya Platforma Çalakiyên Hevpar ên Tevger û Rêxistinên Jinan ên Bakur û Rojhilatê Sûriyê ji aliyê endama rêveber a saziya perwerdeyê ya Dêrikê Buhar Mihemed ve hate xwendin û daxuyaniya Fermandariya Giştî ya YPJ'ê ji aliyê nûnera dibistana Kampa Newroz Nesrîn Ebdullah ve hate xwendin. Piştre koma Yasmîn Efrîn, koma Sorxwîn, koma Eleferiya ya mûzîkê ya jinên ciwan, koma Şehîd Nalîn a dîlanan, koma Şehîd Gerîla ya jinên ciwan  hûnerên xwe nîşandan. Jinan li ber stranan xelekên govendê gerandin.

ANHA

<iframe width="560" height="315" src="https://www.youtube.com/embed/oLlBWCiv3cE" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>