Ciwanên şoreşger: Çalakiyên me wê heta wergirtina cenazeyên şehîdan bidomin

Çekdarên Partiya Demokrat a Kurdistanê (PDK), bi kevir û bombeyên gazê êrişî endamên Tevgera Ciwanên Şoreşger û Yekitiya Jinên Ciwan ên ku ji bo şermezarkirina helwestên PDK`ê û radestnekirina cenazeyên şehîdan, berê xwe dabûn deriyê sînor ê Pêşxabûr kirin. Di encamê de 15 ciwan birîndar bûn û birîna du ji wan dijwar e.

Meşa dirêj a ciwanên Sûriyê bi dirûşma "Werin cenga azadiyê" bi tevlêbûna hezar û 300 ciwanên ji herêmên cuda yên Bakur û Rojhilatê Sûriyê ji Qamişloyê destpê kiribû û piştî meşa 3 rojan, ciwan gihaşt deriyê sînor Sêmalkayê.

Têkildarî îdiayên PDK û dezgehên çapemeniyê yên girêdayî wê, endamê rêveber a Tevgera Ciwanên Şoreşger Tolhildan Zerdeşt ji ajansa me re axivîn û got: “Ji bo em piştgiriya berxwedana gerîla bikin, ji bo şermezarkirina siyasetên PDK`ê yên dijberî doza Kurd û ji bo destekê bidin çalakiya konvedanê ya li Sêmalkayê, me meşa xwe li dar xist.“

Meclisa Malbatên Şehîdan a herêma Cizîrê ji bo wergirtina cenazeyên gerîla Tolhildan Raman û Serdem Cûdî yên di kemîna çekdarên PDK`ê de di 28-29`ê Tebaxê de li Xelîfanê şehîd bûne, 5`ê Cotmehê çalakiya konvedanê li deriyê sînor ê Sêmalkayê li dar xistiye.

'TU ÇEK DI DESTE ME DE TUNE BÛN'

Zeredeşt diyar kir ku dema gihaştin Sêmalkayê, berê xwe dan deriyê sînor ê Pêşxabûr da ku banga radestkirina cenazeyên şehîdan bikin. Lê çekdarên PDK û çeteyên Roj daxwaza wan red kirin û bi kevir û bombeyên gazê êrişî ciwanan kirin. Zeredeşt wiha domand: “Çeteyên Roj mîna kiryarên dewleta Tirk a dagirker ên li dijî ciwanên Kurd li Bakurê Kurdistanê bi xertûman av li me kirin.“

Zeredeşt îşaret bi tevgerên çeteyên Roj ên li dijî şêniyên Rojavayê Kurdistanê û Bakur û Rojhilatê Sûriyê kir û got: “Îdia dikin ku ew şêniyên Rojavayê Kurdistanê diparêzin û navê leşkerên Roj li xwe dikin. Lê di heman demê de êrişî ciwanên Rojava dikin û li dijî daxwazên wan derdikevin.”

Her wiha Zeredeşt diyar kir ku bi ciwanan re çek tune bûn lê ruxmî wê jî êrişî ciwanan kirin û ev yek diyar kir: "Em neçar bûn ku xwe ji wê êrişê biparêzin."

Endamê rêveber ê Tevgera Ciwanên Şoreşger Tolhildan Zeredeşt daxuyand ku serok Mesûd Berzanî şandeya qaşo meclisa sivîl a Efrînê ya girêdayî dewleta Tirk a dagirker û çeteyên dewleta Tirk a dagirker pêşwazî kirin, lê Dayikên Aştiyê yên ku zarokên wan ji bona Kurdistanê û gelê wê şehîd bûne pêşwazî nekirin. Zeredeşt wiha pê de çû: “PDK bi awayekî eşkere hevkariya dewleta Tirk dike. Lê em ê parastina şoreşa xwe bikin. Çalakiya me heta wergirtina cenazeyên şehîdan wê berdewam bike.”

Endama Yekitiya Jinên Ciwan Sarya Cûdî diyar kir ku PDK û Encûmena Nîştimanî ya Sûriyê (ENKS) hemleyên reşkirinê li dijî ciwanan dimeşîne da ku berxwedan û vîna wan bişikîne û got: “Ew hewl didin ciwanan reş bikin. Da ku şoreşa Rojavayê Kurdistanê têk bibin ji ber ku ciwan bingeha şoreşê ne.”

Sarya Cûdî balkişand ser girtina deriyê sînor ê Sêmalkayê ji aliyê PDK`ê ve piştî êrişên çekdarên wê yên li ser ciwanan û got: “Îdia dikin ku ji ber êrişa ciwanan, wan dergeh girt. Lê em hemû dizanin ku ev ne cara yekemîn e derî digirin. Ew dixwazin dorpêçê li ser şêniyên Bakur û Rojhilatê Sûriyê ferz bikin û nehêlin madeyên tenduristî, xizmetguzarî û xwarin derbasî herêmê bibin.”

Sarya Cûdî di dawiyê de diyar kir ku ew berxwedana li hemberî xiyanetê û çalakiyan berdewam bikin heta ku cenazeyên şehîdan radestî malbatên wan werin kirin.

(şx)

ANHA