​​​​​​​Şêniyên Helebê komkujiya dewleta Tirk li dijî Qamişloyê  şermezar kir

Di çarçoveya rêzeçalakiyên şermezarkirina êrişên artêşa Tirk ên li dijî gelê Bakur û Rojhilatê Sûriyê de, bi sedan şêniyên Helebê daketin qadan û soz da ku tola şehîdên malbata Gulo hilînin.

Meş ji pêşiya hola civînan a li beşa rojava ya taxa Şêxmeqsûdê dest pê kir û ber bi kolanên taxê ve gerîn. Şêniyan wêneyên rêber Abdullah Ocalan, wêneyên her 3 şehîdên malbata Gulo,  Yusif Gulo, Mezlûm Gulo û Mihemed Gulo û sembolên kurdî rakirin.

Her wiha şêniyan diruşmên "Xwîne Kurd ne erzan e", "Dê kujer berdêleke biha bidin" û "Em fedekarê welatê xwe ne" berz kirin.

Li Qada 7 Şehîdan a beşa rojhilat a Şêxmeqsûdê meş vegerî mîtîngê û deqeyeke rêz hate girtin. Dûvre endamê Meclisa Giştî ya Taxên Şêxmeqsûd û Eşrefiyê Welat Mamo û Hevseroka Meclisa Malbatên Şehîdan a Helebê Rewşan Mihemed axivîn.

Axîveran sersaxî ji malbatên hemû şehîdên Şoreşa 19`ê Tîrmehê re xwest û soza tolhildana her sê şehîdên ji malbata Gulo da.

Axêveran diyar kir ku dewleta Tirk li dijî gelê Kurd û gelê Rojhilata Navîn siyaseta qirkirinê dide meşandin û sûcan li dijî wan pêk tîne, da ku xewanên xwe yên Osmanî pêk bîne. Her wiha dewleta Tirka dagirker, piştî çeteyên DAIŞ`ê û hevalbendên wê di têkbirina şoreşa gelê Bakur û Rojhilatê Sûriyê de bi bin ketin, bi awayekî eşkere destwerdan kir û sûc pêk anîn.

Her wiha axîveran destnîşan kir ku bersiva herî guncaw ji wan sûcan re gel yekitî û biratiya xwe xurt bike ku li hember wan êrişên bi armanca têkbirina pêşeroja gelên Rojhilata Navîn, bisekine.

Di dawiyê de axêveran soza şopandina xeta şehîdan û bilindkirina asta têkoşînê da, ku xewnên wan ên avakirina welatekî demokrat û azad bi cih bînin.

(eh)

ANHA