Jinên ciwan ên Şehbayê berxwedana gerîlayan silav kir

Artêşa Tirk a dagirker ji nêzî 7 mehan ve êrişên hovane li dijî Avaşîn, Zap û Metîna yên Herêmên Parastinê yên Medyayê pêk tînin. Artêşa Tirk a dagirker ji bêdengiya navneteweyî sûdê digire û çekên kîmyewî bi kar tîne. Gerîlayan azadiyê li hemberî van êrişan berxwedaneke bê hempa raber dikin.

Bi encama piştevaniya berxwedana hêzên gerîla li dijî êrişên dewleta Tirk a dagirker, bi sedan endamên Yekitiya Jinên Ciwan û Tevgera Hîlala Zêrîn li ser rêya sereke ya naverasta Fafînê kom bûn, alên Yekitiya Jinên Azad, wêneyên rêber Abdullah Ocalan û pankartên "Jin jiyan azadî", "Azadiya rêber Apo azadiya me ye" û "Hêzên YJA-STAR rûmeta me ne" hildan.

Meş  bi diruşmên silavkirina berxwedana hêzên gerîla li dijî dagirkeriya Tirk û silavkirina Berxwedana Serdemê û şermezarkirina bêdengiya navneteweyî dest pê kir.

Meş li pêş mizgefta mezin a li aliyê bakurê navçeya Fafînê rawestiya û li wir daxuyaniyek hat dayîn. Endama Yekitiya Jinên Ciwan a herêma Efrînê Sîdra Hemo daxuyanî xwend.

Di daxuyaniyê de îşaret bi berxwedana gerîlayan a li hemberî êrişên dewleta Tirk a dagirker hate kirin û wiha hate gotin: "Berxwedana dîrokî ya ku HPG’ê û  YJA-STAR ji zêdetirî 40 salî ve li dijî dagirkeriya Tirk pêk tînin berdewam dike. Dagirker û hevkarên wê hewl didin tevgera azadiyê tune bikin. Lê berxwedana wan a bi dirêjahiya salên borî ji cîhanê re îsbat kir ku tevgerê navê xwe bi tîpên zêrîn li rûpelên dîrokê daye."

Di berdewama daxuyaniyê de hate diyarkirin ku ji nêzî 7 mehan ve dagirkeriya Tirk êrişên barbarî li dijî çiyayên Kurdistanê pêk tîne û ji bo pêkanîna aramnca xwe tevahî çekên kîmyewî û qedexe bi kar tîne û di encama wê de gelek gerîla şehîd bûn.

Di daxuyaniyê de wiha hate destnîşankirin: "Sûcên dewleta Tirk a dagirker li pêş çavên cîhanê pêk tîne û wê muhasebe nakin dikeve xana sûcên şer û dijmirovî."

Di dawiya daxuyaniyê de wiha hate gotin: "Yekitiya Jinên Ciwan û tevahî şêniyên herêmê piştevaniya berxwedana HPG’ê û YJA-STAR li dijî êrişên dewleta Tirk dikin û bang li rêxistin û aliyên hiqûqî û mirovî kir ku sûcên dagirkeriya Tirk rawestînin û muhesebe bikin."

(fr)

ANHA