TEV-DEM`ê bang li OPCW`ê kir: Bila komîteyek biçe Herêmên Parastinê û lêkolîn bike

Bangawaziya TEV-DEM`ê di demekê de tê ku Rêxistina Qedexekirina Çekên Kîmyewî (OPCW) îro civîna xwe li dar dixe. Demeke berê jî Fermandariya HPG`ê û KCK`ê bang li li YE, DYA û rêxistinên navneteweyî kiribû ku pêşî li bikaranîna çekên kîmyewî ji aliyê dewleta Tirk ve bigirin.

Îro TEV-DEM`ê bi daxuyaniyekê banga avakirina komîteyeke şopandinê kir, da ku biçe Herêmên Parastinê yên Medyayê û derbarê bikarnîna çekên kîmyewî ji aliyê dewleta Tirk ve lêkolîn bike.

Di daxuyaniyê de wiha hate gotin: "Tevî bangawaziyên rêxistinên hiqûqî û civakî yên cîhanî yên qedexekirina bikaranîna çekên kîmyewî di şeran de û ruxmî qanûnên navneteweyî yên NY`yê û YE`yê jî yên qedexekirina bikaranîna van çekan, lê dewleta Tirk di şerê xwe yê li dijî îradeya gelê Kurd de û di nav de şerê  li dijî gerîlayên HPG û YJA Starê de bi domdarî û bê dudilîç heta roja îr çekên kîmyewî bikar tîne.

Di daxuyaniyê de bikaranîna çekên kîmyewî ji aliyê dewleta Tirk ve di şerê li Efrîn, Serêkaniyê û bi awayekî bêsûber, hate bibîrxistin û hate gotin, “Badnorên wê zelal û eşkere ne û gelek îsbatên wê yekê hene. Ev yek li pêş çavên civaka navneteweyî û hemû rêxistinên ku bikaranîna çekên kîmyewî qedexe dikin, tê kirin. Qedexekirina van çekan û rêgirtina li belavbûna wan, berpirsiyariyeke mirovî û erkeke exlaqî ye.”

TEV-DEM`ê banga tevlîbûna ji mesa ku ji aliyê KCDK-E`yê îro li pêş pêşiya avahiya Rêxistina Qedexekirina Çekên Kîmyewî li Holandayê tê lidarixstin, kir û got: “Em bang li hemû hêzên civakî, ekolojîk, rêxistinên hiqûqî û di serê de gelên me li Ewropayê dikin ku tev li meşa KCDK-E`yê bibin da ku hesab ji dewleta Tirk a faşîst were xwestin.”

Daxuyaniyê wiha dewam kir: “Ji bo ku peyam û banga we bighêje Rêxistina Qedexekirina Çekên Kîmyewî ku îro civîna xwe li Lahayê li dar dixe, ji bo ku sînor ji belavbûn û bikarîna wan çekan re were danîn û hesab ji aliyên ku wan çekan bi kar tînin bê xwestin û di serî de dewleta Tirk a dagirker.”

TEV-DEM`ê di dawiya daxuyaniya xwe bang li OPCW`ê kir ku komîteyeke şopandinê were avakirin ber bi Herêmên Parastinê yên Medyayê ve werin şandin da ku derbarê bikaranîna çekên kîmyewî ji aliyê dewleta Tirk a dagirker ve, lêkolîn bike.

(bx)

ANHA